ווי באריכטעט פארגאנגענע וואך האבן טויזענטער חסידי בעלזא איבער די וועלט אויפגענומען מיט פרייד די מזל טוב וואונטש מיטן געבורט פון א אור אייניקל ביי כ"ק אדמו"ר מבעלזא שליט"א, עלטסטע בן זכר ביי הרה"ג ר' שלום רוקח שליט"א, עלטסטע זון פון הגה"צ ר' אהרן מרדכי רוקח שליט"א בנו יחידו פונעם רבי'ן, זעענדיג ווי די שיינע שלשלת הקודש ציהט זיך ווייטער לשם ולתפארת.
לכבוד די שמחה זענען הונדערטער בעלזא חסידים געפארן קיין ארץ ישראל מיטצולעבן די קייט פון ימי אורה ושמחה, אויף שבת קודש פרשת חיי שרה האבן זיך שוין אנגעזעהן א שטראם פון געסט, סיי פון אלע שטעט פון ארץ ישראל און סיי פון אויסלאנד, און פרייטאג צונאכטס איז געפראוועט געווארן די שמחת השלום זכר ביים טיש פונעם גרויסן זיידן דער בעלזא רבי שליט"א אין קרית בעלזא ירושלים.
זונטאג נאכט איז פארגעקומען די מעמד הקריאת שמע ליינען אינעם היכל ביהמ"ד הגדול אין קרית בעלזא, אין שפיץ פונעם גרויסן זיידן דער רבי שליט"א וועלכער האט געליינט קריאת שמע מיט די קינדער, און מען האט געזינגען ניגוני שמחה. דערנאך האט דער רבי געטיילט פעקלעך פאר די אייניקלעך און אור אייניקלעך, און דער אבי הבן האט פארטיילט פעקלעך פאר די טויזענטער ילדי התשב"ר.
די סעודת הוואכנאכט איז פארגעקומען בביתו נאוה קודש פונעם רבי'ן, געאייגענט פאר די הונדערטער געסט פון אויסלאנד, וועלכע האבן אויך געהאט די געלעגנהייט אריינצוגיין אל הקודש פנימה מיט קוויטלעך. נאכן בענטשן האט זיך דער רבי אויפגעשטעלט טאנצן אויף א וויזניצע טאנץ ניגון, זייענדיג גאר א זעלטענע שריט ווען דער רבי איז ליידער נישט בכח אויפצושטיין אויף די פיס די לעצטע פאר יאר.
מאנטאג אינדערפרי האבן זיך טויזענטער חסידים פארזאמלט אין ביהמ"ד הגדול אין קרית בעלזא, מען האט געדאווענט שחרית אינאיינעם מיטן רבי'ן, און אלס שליח ציבור האט געדינט דער אבי הבן הרה"ג ר' שלום רוקח שליט"א. תיכף נאכן דאווענען איז דער רבי ארויף אויפן באלעמער וואו עס איז פארגעקומען די שמחת הברית.
אלס קוואטער האט געדינט דער זיידע הגה"צ ר' יחיאל מאיר פאנעט שליט"א, מיט כסא של אליהו איז מכובד געווארן דער עלטער עלטער פעטער כ"ק אדמו"ר מוויזניץ שליט"א, מיטן כיבוד פון מן הכסא איז מכובד געווארן כ"ק אדמו"ר מסטראפקוב שליט"א, און מיטן כיבוד פון מן הסנדק איז מכובד געווארן הגה"צ ר' אהרן שיף שליט"א גאב"ד אנטווערפן.
מיט די חיקות זענען מכובד געווארן די פעטערס כ"ק אדמו"ר מגארליץ שליט"א, הגה"צ אבד"ק מאקאווא אשדוד שליט"א, הגה"צ ר' חיים צבי שפירא שליט"א ראב"ד בעלזא, און די בני משפחת המלוכה.
דער עלטער זיידע כ"ק אדמו"ר מבעלזא שליט"א איז מכובד געווארן מיט סנדקאות, דער עלטער זיידע כ"ק גאב"ד מאקאווא שליט"א מיט ברכות וקריאת השם, דער זיידע הגה"צ ר' אהרן מרדכי רוקח שליט"א מיט עמידה לברכות, און דער מוהל איז געווען דער אבי הבן הרה"ג ר' שלום רוקח שליט"א.
א ספעציעלע התרגשות האט געהערשט ביים גאנצן ציבור ווען עס איז געגעבן געווארן די נאמען פארן רך הנימול "יהושע בן שלום", גענוי די זעלבע נאמען פונעם גרויסן זיידן הרה"ק רבי יהושע דער מיטעלע בעלזא רב זי"ע, וועלכער איז געווען א זון פונעם ערשטן בעלזא רב הרה"ק דער שר שלום זי"ע. די נאמען "יהושע" נאכן מיטעלן בעלזא רב איז אצינד צום ערשטן מאל געגעבן געווארן אין די משפחת המלוכה ביים רבי'ן שליט"א, נאך וואס דער רבי שליט"א איז אן איידעם ביי הרה"ק בעל ישועות משה מוויזניץ זצ"ל.
נאכן ברית האט דער ציבור אויסגעבראכן אין הילכיגע געזאנג, און דער רבי שליט"א האט זיך ווידער אויפגעשטעלט טאנצן אויף די פיס, אריינשלעפנדיג דעם גאנצן ציבור אין א מורא'דיגע התרגשות. שפעטער נאכמיטאג איז דער רבי אריינגעקומען אינעם גרויסן שטוב צום סעודת ברית, וואו מען האט געזינגען פאסיגע ניגוני שמחה, און א נייער ניגון וואס איז פארפאסט געווארן לכבוד די שמחה. כ"ק גאב"ד מאקאווא שליט"א איז מכובד געווארן מיטן בענטשן, און דער בעלזא רבי האט געזאגט די הרחמן'ס. שפעטער אין טאג האט דער רבי שליט"א געזעגנט די געסט פון אויסלאנד, איידערן אהיימפארן למקומות מושבותיהם.
