חסידי סקווירא אין שטאט אנטווערפן האבן מיטגעלעבט א שיינע באזוך פון הגה"צ ר' יצחק טווערסקי שליט"א בן כ"ק אדמו"ר מסקווירא שליט"א, וועלכער איז ספעציעל ארויסגעפארן קיין אנטווערפן בשליחות הקודש פון אביו הגדול דער רבי שליט"א צו מחזק זיין די חסידים פון אנטווערפן בקירוב מקום.
דאנערשטאג חיי שרה האט דער חשובער גאסט געלאנדעט אין אנטווערפן, וואו ער איז געווארן אפגעווארט דורך די עסקני הקהילה, און הרה"ג ר' יעקב יוסף ברייער שליט"א דומ"ץ סקווירא אנטווערפן. אין לויף פון די טעג האט ער באזוכט ביי די רבני העיר, כ"ק אדמו"ר מפשעווארסק שליט"א, הרה"ג ר' עמרם העניג שליט"א דיין אין קהל מחזיקי הדת, דער סקווירא דיין, און נאך עטליכע רבנים.
די הויכפונקט פון די באזוך איז געווען די שבת התאחדות פאר חסידי סקווירא תושבי העיר, וואס איז פארגעקומען אינדרויסן פון שטאט בבנין ישיבת עץ חיים ווילרייק, וואס איז פראכטפול צוגערישט געווארן פאר די פילע געסט וואס זענען געקומען מיטהאלטן דעם שבת. הגה"צ ר' יצחק האט געדאווענט פארן עמוד קבלת שבת און מוסף און ראש חודש בענטשן, פארגעזינגען די זמירות ביי די סעודות שבת קודש, און משמיע געווען לענגערע שמועסן בדברי חיזוק והדרכה בתורה וחסידות.
מוצאי שבת איז פארגעקומען א מלוה מלכה אין סקווירא בית המדרש, וואו מען האט געהערט א רייכע שמועס פון די עסקני הקהילה, איבער די השתלשלות פונעם סקווירא שטיבל אין אנטווערפן וואס איז געגרינדעט געווארן מיט גענוי פינף און דרייסיג יאר צוריק.
זונטאג פרשת תולדות איז פארגעקומען ספעציעלע מעמדים פאר די פרחי החסידים, א מעמד פאר די בחורים, א מעמד פאר די קינדער, און א מעמד פאר די עלטערע מיידלעך. מאנטאג איז פארגעקומען די מעמד יציקת הבורות פאר די נייע מקוה אין סקווירא בית המדרש, און א ספעציעלע מסיבה אויפצוטרייבן געלט פארן קרן הבנין.
