חסידי לעלוב אין ניו יארק גרייטן זיך צו מקבל זיין בהדרת כבוד כ"ק אדמו"ר מלעלוב שליט"א, וועלכער קומט צו פארן פון ארץ הקודש לפאר על ראש שמחתו, די שמחת החתונה פון נכדתו הכלה שתחי', א טאכטער פונעם רבינ'ס איידעם הגה"צ ר' ברוך שפיטץ שליט"א, זון פון כ"ק אדמו"ר מסערט וויזניץ ארה"ב שליט"א.
היינט מוצאי שבת קודש איז פארגעקומען די שמחת הפארשפיל און מעמד צאתכם לשלום אין ביהמ"ד הגדול לעלוב אין בית שמש, לקראת דעם רבינ'ס ארויספארן קיין ניו יארק. שפעטער ביינאכט איז דער רבי שליט"א ארויסגעפארן אויפן וועג צום לופטפעלד, און איז ערווארטעט צו לאנדן אין ניו יארק מארגן זונטאג פארטאגס אין א מזל'דיגע שעה.
מארגן זונטאג אינדערפרי וועט דער רבי אנקומען אויף תפילת שחרית בבית מדרשו קהל בית דוד לעלוב אויף די דריי און פערציגסטע סטריט, וואו נאך שחרית וועט פארקומען א מעמד קבלת פנים. די חתונה וועט פארקומען דעם מאנטאג בעז"ה אין די לעגאסי זאל אין בארא פארק, נאכגעפאלגט מיטן שבת שבע ברכות וואס דער רבי שליט"א וועט פראווענען אינעם עיר ואם בישראל בארא פארק, די תפילות אין לעלובער בית המדרש, און די טישן אין זאל פון אנשי ספרד.
