חסידי ומעריצי בית סאדיגורא בארצות הברית וקאנאדע גרייטן זיך צו מקבל פנים זיין בהדרת כבוד כ"ק אדמו"ר מסאדיגורא שליט"א, וועלכער וועט דעם סוף וואך מופיע זיין אויפן אמעריקאנעם קאנטינענט צו משפיע זיין אויף עדת צאן מרעיתו בערי הגולה, און באשיינען א רייע שמחות און מעמדים בקרב הקהילה.
צוערשט וועט דער רבי אנקומען קיין מאנטריאל קאנאדע, צו באשיינען די שמחת החתונה פונעם עלטסטן קינד ביי זיין שוואגער הרב ברוך שטערנבוך שליט"א, זון פונעם חותן המלך הגה"צ ר' אשר חיים שטערנבוך שליט"א אב"ד אהל יעקב אנטווערפן, און איידעם ביי הגה"צ אבד"ק דזיבוי מאנטריאל שליט"א. דער רבי וועט לאנדן אין מאנטריאל מיטוואך פרשת תולדות ראש חודש כסלו, דאנערשטאג נאכט וועט פארקומען די שמחת החתונה, און שבת קודש וועט דער רבי זיין צוגאסט אין מאנטריאל אויף א ענגע פארנעם בקרב בני המשפחה.
זונטאג פרשת ויצא וועט דער רבי ארויספארן פון מאנטריאל קיין ניו יארק, און מופיע זיין בהדרו אינעם עיר התורה והחסידות לעיקוואד, וואו עס וועט פארקומען א מעמד הכנסת ספר תורה צום סאדיגורא בית המדרש און א מעמד קבלת פנים. דערנאך וועט דער רבי אנקומען קיין בארא פארק פאר עטליכע טעג, און די הויכפונקט פון די נסיעה וועט זיין א גרויסע שבת התאחדות פאר כלל חסידי סאדיגורא בארה"ב, וואס וועט פארקומען אין די פראכטפולע HCS רעזארט אין סאוט פאולסבורג במעמד קהל רב.
