חסידי ומעריצי בית סטוטשין אינעם עיר ואם בישראל וויליאמסבורג גרייטן זיך מיט גרויס התרגשות צו מיטהאלטן א געהויבענע שבת בצל הקודש פון כ"ק אדמו"ר מסטוטשין שליט"א, וועלכער וועט קומען פראווענען א גרויסן שבת בתוככי העיר, זייענדיג דאס ערשטע מאל וואס דער רבי שליט"א וועט פראווענען א גרויסע שבת אין וויליאמסבורג.
דער רבי שליט"א וועלכער פירט אן זיין שיינעם הויף אין בארא פארק, און פארט זעלטן ארויס צו אנדערע פלעצער פראווענען שבתים און עפנטליכע מעמדים, האט אצינד באוויליגט אנצונעמען די בקשה פון פילע חסידים ואנשי מעשה תושבי וויליאמסבורג, און וועט פראווענען א גרויסן שבת אין וויליאמסבורג קומענדיגן שבת פרשת ויצא, וואו עס איז ערווארטעט א ריזן ציבור מיטצוהאלטן די תפילות און טישן בצל הקודש.
די עסקנים האבן ארויסגעדינגען די גרויסע עידן פאלאס זאל אויף פלאשינג עוועניו, וואס וועט ווערן אויסגערישט מיט הונדערטער פלעצער פאר די תפילות און טישן. נאך פלענער ווערן אויסגעארבעט איבער די סדר ימי הביקור אין די טעג ארום שבת, וואס אנטשפרעכט צו זיין א גייסטרייכע איבערלעבעניש פאר חסידים ואנשי מעשה תושבי העיר.
