א שווערע פארלוסט האט באטראפן די עולם החסידות און די ניו יארקער אידנטום, מיט די פטירה בשיבה טובה פון הרה"צ רבי ארי' לייבוש לויפער זצ"ל האדמו"ר מנדבורנא דעברעצין, וועלכער איז געווען א שריד לדור דעה און אן אוד מוצל מאש, זייענדיג א נצר לקדושי עליון די הייליגע נדבורנא דינאסטיע.

הרה"צ ר' לייבוש זצ"ל איז געווען א זון פון הרה"צ רבי משה מנחם מדעברעצין זצ"ל, א זון פון הרה"ק רבי יוסף מנירעדהאז זצ"ל, א זון פון הרה"ק רבי מרדכי'לע מנדבורנא זי"ע. מצד אמו איז ער געווען אן אייניקל פון הרה"צ רבי נפתלי ווייסבלום זצ"ל מליזענסק, בן אחר בן צום הייליגן צדיק דער רבי ר' אלימלך זי"ע פון ליזענסק, און נאך פילע צדיקים וקדושים.

אין זיינע יונגע יארן איז ר' לייבוש אויפגעוואקסן אין דער אלטער היים אין שטאט דעברעצין אין אונגארן, וואו ער האט קענענגעלערנט די פארצייטישע אידן חסידים ואנשי מעשה, זיך געדרייט און זיך געקלאמערט ביי געהויבענע אידן אין די אונגארישע שטעטלעך, און מיט זיין גרויסן יחוס האט ער גענאסן א קירבה יתירה ביי פילע צדיקים און ערליכע אידן.

ליידער האט ער מיטגעטיילט א שווערן גורל ביים צווייטן וועלט מלחמה, ווען ער איז פארשיקט געווארן קיין אוישוויץ אויף שווערע צוואנגס ארבעט, מיט גרויס רחמי שמים האט ער איבערגעלעבט די קריג, אנדערש ווי א מערהייט פון זיינע געשוויסטער און זיינע עלטערן וואס זענען ליידער אומגעקומען על קידוש ה'.

נאכן קריג איז ער ארויסגעקומען קיין אמעריקע וואו ער האט אנגעהויבן זיין לעבן פון דאסניי, און אויפגעשטעלט א הערליכע משפחה, אבער זיין מחשבה איז שטענדיג געווען פארבינדן מיטן אמאל, זיין גרויסן יחוס און זיינע יונגע יארן זענען שטענדיג געווען נר לרגליו, ער פלעגט דערציילן און דערציילן וואס ער האט מיטגעלעבט, למען ידעו דור אחרון.

זיין רייכע היסטארישע לעבן איז אצינד געשלאסן געווארן, ווען ר' לייבוש איז נפטר געווארן לחיי העולם הבא בשיבה טובה, אין טיפן עלטער פון זיבן און ניינציג יאר. די לוויה איז פארגעקומען היינט זונטאג ביי שומרי הדת אין בארא פארק, און ער ווערט געפירט קיין ארץ ישראל וואו ער וועט געברענגט ווערן למנוחת עולמים.