חסידי וויזניץ בארצות הברית נעמען אויף מיט גרויס פרייד די ידיעה מרנינה, אז בברכתו ובעידודו פונעם מנהיג העדה כ"ק אדמו"ר מוויזניץ שליט"א לרפואה שלימה, וועט דעם רבינ'ס יונגסטע זון הגה"צ ר' יעקב מרדכי האגער שליט"א וועלכער דינט היינט אלס רב חסידי וויזניץ אין אלעד, ווערן אויפגענומען אלס רב ואב"ד פון חסידי וויזניץ בערי ארצות הברית וקאנאדע.
דער רב שליט"א וועלכער איז אן איידעם אין אמעריקע, ביי כ"ק אדמו"ר מקאסאן לעיקוואד שליט"א, האלט אן א נאנטע קשר מיט די חסידים פון אמעריקע, און איז כסדר דורש בשלומם הטוב, אצינד וועט דער רב שליט"א מכהן זיין אלס אב"ד חסידי וויזניץ בארה"ב און קאנאדע, וואס נעמט אריין הערליכע בליענדע קהילות אין מאנסי, בארא פארק, וויליאמסבורג, לעיקוואד, און מאנטריאל, א סך הכל פון הונדערטער משפחות חסידי וויזניץ בערי ארה"ב וקאנאדע.
פארגאנגענע וואך איז פארגעקומען אן אסיפה בביתו נאוה קודש פונעם וויזניצער רבי'ן שליט"א, וואו דער רבי האט אויסגעדרוקט רצון קדשו פאר די משמשים בקודש און מקורבים, צווישן זיי הרב בנציון שטאנגער הי"ו, הרב הערשל כ"ץ הי"ו, הרב שאול גרינבערגער הי"ו, און דער דיין הרה"ג ר' ישראל מיללער שליט"א, זאגענדיג אז בנו הצעיר הגה"צ ר' יעקב מרדכי שליט"א זאל ווערן רב פאר חסידי וויזניץ אין אמעריקע און קאנאדע, און אויספירן זיין שליחות צו שטיין לימינם פון די קהילות הקודש און די חסידים מעבר לים.