חסידי וויזניץ נעמען אויף מיט איבערראשנדע פרייד די גליקליכע בשורה, איבער א העכסט מוצלח'דיגע מקח וואס איז היינט געשלאסן געווארן, אפצוקויפן א ריזן שטח און א בנין רחבת ידים אין הארץ פון שטאט בארא פארק, וואו עס וועט ווערן אויפגעבויעט א שפאגל נייע ריזן ביהמ"ד הגדול והחדש דקהל תורת חיים וויזניץ, בנשיאות כ"ק אדמו"ר מוויזניץ שליט"א פון בארא פארק.

די רעדע איז פון א ריזן בנין ביים ווינקל פון די צוויי און פופציגסטע סטריט און נוא יוטרעקט, וואו עס געפונט זיך אצינד א גרויסע עלעקטעריק סופליי פירמע, עטליכע הייזער ארויפציר פון די עקזיסטירנדע בית המדרש ביים ווינקל פון דריי און פופציג אין נוא יוטרעקט. די בנין געפונט זיך אויף א גרויסע שטח וואו עס וועט בעז"ה אויפגעבויעט ווערן א ריזן בנין ביהמ"ד הגדול והחדש וואס וועט צוברענגען גרויס הרחבת הדעת פאר די קומענדיגע יארן.

דאס קומט נאכדעם וואס די ביז יעצטיגע ביהמ"ד וואו די קהילה איז שוין איינקוואטירט העכער א יובל יארן, איז שוין לאנג אויסגעוואקסן איר געברויך, און טראץ וואס מען האט אביסל צוגעבויעט מיט עטליכע יאר צוריק, איז עס ווייט פון גענוג צו קענען אקאמאדירן דעם ציבור חסידים, וואס ציילט זיך שוין היינט קרוב צו טויזענט משפחות בליעה"ר.

אצינד איז מען בסייעתא דשמיא אריין אין קאנטראקט אפצוקויפן דעם ריזן שטח וואו עס וועט אויפגעבויעט ווערן די נייע בנין בית המדרש, א ריזן היכל וואס וועט ארייננעמען צען טויזענט סקווער פיס, א גרויסע היכל התורה און א פראכטפולע מקוה, זעקס שטיבלעך פאר מנינים און נאך פילע באדערפענישן, אין די צייט וואס די ביז יעצטיגע בנין ביהמ"ד וועט דינען פאר אנדערע געברויכן פון די קהילה און מוסדות בתוככי העיר.

די עלף מיליאן דאללערדיגע מקח קומט צושטאנד מיטן הילף פון חשובע נדיבים בעם, די ראשי הקהילה והמוסדות און די געטרייע עסקנים וואס ארבעטן שוין אויף דעם א לענגערע צייט. די גאנצע בוי פראיעקט איז ערווארטעט צו דערגרייכן דעם ריזן ציפער פון פופציג מיליאן דאללער, וואס וועט געשאפן ווערן מיטן הילף פון חסידי וידידי בית וויזניץ ברחבי תבל וואס קוקן ארויס אויף דעם געוואלדיגן הצלחה.

די גאר פרייליכע מקח איז צושטאנד געקומען אין א גרויסן טאג, ביום החופה פון א אייניקל ביי כ"ק אדמו"ר מוויזניץ שליט"א פון בארא פארק, ווען די אבות הקדושים קומען אראפ פון הימל און פרייען זיך מיט בשמחת צאצאיהם, זעענדיג ווי די גאלדענע קייט ציהט זיך ווייטער לשם ולתפארת.