מיט 40 יאר צוריק האט אין בארא פארק אויפגעשיינט אן אור חדש, א חידוש פון א מציאות בעולם התורה הישיבות. ישיבת בית מאיר איז אויפגעקומען אויפ'ן האריזאנט אלס א ישיבה יחיד במינה, וואו לומדות און חסידות, עמקות און עבודת ד' האבן זיך פאראייניגט מיט א שטרעבן צו הייבן אירע תלמידים ברום מעלת התורה והעבודה.
אין לויף פון די פערציג יאר האט ישיבת בית מאיר ארויסגעגעבן אריבער טויזענט תלמידים בליעה"ר כ"י וואס האבן קונה געווען זייער לעבנסוועג בין כותלי הישיבה, און געפארעמט זייער נשמה אונטער די הדרכה און השפעה פון בארימטע מרביצי תורה ויראה, און אין די געבענטשטע הענט פונ'ם מייסד און ראש הישיבה הגה"צ ר' יעקב הורוויץ שליט"א, דער עמוד האש ההולך לפני המחנה וואס טראגט דער ישיבה על לוח לבו און באגלייט די הצלחה פון דריי דורות תלמידים.
ישיבת בית מאיר האט זיך ערווארבן א פלאץ אויפ'ן מזרח-וואנט אין די עולם הישיבות. די זעלטענע זיסע פירות זאגן עדות אויף דעם געקליבענעם פראדוקט, ווען אין א שטוינענדע מציאות זענען רובם ככולם פון יוצאי תלמידי ישיבת בית מאיר בארימטע מרביצי תורה, מחנכים און כלי קודש, רבנים, דיינים, מורי הוראה, און ערליכע בעלי בתים בעלי מדות תרומיות, וואס זייער צוגעבינדנקייט צו די גמרא איז קענטיג עד היום הזה.
אצינד נאך פערציג יאר נעמען זיך צונויף, צום ערשטן מאל, די טויזנטער תלמידים פון ישיבת בית מאיר, צו א היסטארישער כינוס 'יובל ארבעים', אויף וועלכע די געוועזענע תלמידים בכל מקומות מושבותיהם קוקן אלע ארויס מיט טיפע התרגשות און נשמה-שפאנונג.
דער כינוס וואס וועט אי"ה פארקומען קומענדיגן זונטאג משפטים הבעל"ט, וועט זיך אי"ה אנהייבן מיט א סדר הלימוד בחברותא צווישען כותלי היכל הישיבה, באגלייט מיט א שיעור פון הגאון המפורסם רבי שלמה בריסק שליט"א, ר"מ הישיבה, א כינוס של תורה וואס וועט געוויס אויפברענגען ווארעמע געגועים און נאסטאלגיע צו ימי קדם.
דער גראנדיעזער מסיבת הכינוס וועט דערנאך פארקומען אין פראכטפולן הייטנער זאל, קעגנאיבער בנין הישיבה, אין אן אווענט וואס איז ערווארטעט ארומצונעמען די טויזנטער תלמידים מיט א שטורעמישע גייסט פון אחוה ורעות, און אנפילן די הערצער מיט איבערפליסנדע אהבת קדומים. ביים מסיבת הכינוס וועלן געהערט ווערן דורכדרינגעדע דרשות פון רמ"י הישיבה הוותיקים, און פון אוסגערימטע בוגרי תלמידי הישיבה, און א היסטארישע פרעזענטאציע וועט דורכלויפן די פערציג יאר פון אויסטערלישע הרבצת תורה.
תלמידי ישיבת בית מאיר, הנה ימים באים!
