מטעם קהל חסידי קאסוב איז געמאלדן געווארן אז מארגן דינסטאג ערב ראש חודש, וועט פארקומען א עצרת תפילה והתעוררות צו מעורר זיין רחמי שמים לרפואת כ"ק אדמו"ר מקאסוב שליט"א, וועלכער פארט היינט ארויס צום דריטן מאל קיין דייטשלאנד אויף צרכי רפואה, און איז אנגעוויזן אויף רחמי שמים.
היינט מאנטאג נאך שחרית ביומא דהילולא קדישא פונעם רבינ'ס פאטער כ"ק אדמו"ר מקאסוב זאליטשיק זצ"ל, האט דער רבי זיך געזעגנט פון די חסידים בעפאר די נסיעה, און געבעטן זיי זאלן דאווענען פאר אים און אינזין האבן לרפואה שלימה.
מארגן דינסטאג זיבן אזייגער נאכמיטאג, וועט מען זיך צוזאמנעמען אין קאסובער בית המדרש אין בארא פארק ברוב עם, און מיט א כח הרבים איינרייסן פארן רבינ'ס געזונט, כ"ק מרן הרה"צ רבי שרגא פייוויש בן מלכה לרפואה שלימה.
