א זעלטן גייסטרייכע שבת איז אריבער אויף צענדליגע נגידים ותומכים אינערהאלב די וויזניצע אימפעריע, ווען מ'האט געהאט די זכיה מיטצוהאלטן א היסטארישע שבת בצל הקודש פון כ"ק אדמו"ר מוויזניץ שליט"א, וועלכער איז געקומען ספעציעל צו פארן פון ארץ ישראל קיין ניו יארק צו באשיינען דעם שבת מתנה טובה, און אויפטרייבן גרויס געלט צו דעקן די חובות פון די מאסיווע פראיעקט אויפצובויען די בנין הגדול בית וויזניץ אין קרית וויזניץ בני ברק.
פארלאפענעם דאנערשטאג בחוקותי אנקומענדיג קיין ניו יארק, איז דער רבי באלד אריינגעפארן צו די פראכטפולע מלון רעזארט אין ניו דזשערזי, וואו עס איז געפראוועט געווארן די געהויבענע שבת אויף א גאר רייכע און עלעגאנטע פארנעם. אויף שבת זענען געקומען צו פארן א שיינע ציבור תומכים נכבדים, סיי וויזניצע חסידים און סיי פון אנדערע קרייזן, ובראשם כ"ק אדמו"ר מוויזניץ שליט"א פון ירושלים וועלכער האט געפראוועט דעם גאנצן שבת אינאיינעם בשבת אחים גם יחד, די תפילות און טישן אינאיינעם מיט ש"ב דער וויזניצער רבי שליט"א פון ארץ ישראל.
דורכאויס דעם גאנצן שבת האבן מהנה געווען בשירה וזמרה דער לעגענדארער בעל מנגן פון ארץ ישראל ר' יעקב יודא דאסקאל, אינאיינעם מיט די וויזניץ בארא פארק קאפעליע וואס איז באקאנט איבער גרעיטער ניו יארק אלס א געשמאקע חסידישע קאפעליע פון היימישע אינגעלייט.
די תפילות האבן פארגעדאווענט ביידע רבי'ס, און אזוי אויך האבן ביידע רבי'ס פארגעזינגען די זמירות ביי די טישן, דער אורח הכבוד ביים שבת איז געווען הגה"צ אבד"ק לימינוב שליט"א וועלכער האט עטליכע מאל אויפגעטרעטן מיט גאר רייכע דרשות און שילדערונגען, און אזוי אויך האט מען געהערט א שמועס פון הרב אברהם סאלינסקי שליט"א אויף די ענגלישע שפראך.
