דעם קומענדיגן שבת קודש פרשת משפטים שבת שקלים, וועט געפראוועט ווערן א געהויבענע שבת אינעם ווייטן לאס אנדזשעלעס, בצל הקודש פונעם חשובן גאסט פון ניו יארק, כ"ק אדמו"ר מקאשוי שליט"א, וועלכער קומט צו פארן קיין לאס אנדזשעלעס לטובת מוסדותיו הקדושים, און צו משפיע זיין פאר די לאקאלע אידנטום מבאר תורתו.
דער רבי שליט"א איז ממשיך מסורת אביו הגה"ק מקאשוי זי"ע בעל ברכת שמים, וועלכער פלעגט כסדר פארן קיין לאס אנדזשעלעס צו משפיע זיין אויף די תושבי העיר. דער רבי שליט"א פארט אהין כסדר יעדע שטיק צייט, און גרייט זיך אצינד אויפן היי יעריגן נסיעה וואס קומט פאר די וואך פרשת משפטים.
דעם דאנערשטאג וועט דער רבי שליט"א מופיע זיין בשערי העיר, און האבן די אכסניא אין שטוב פון הרבני הנגיד ר' אפרים שמואל דויטש הי"ו, דאנערשטאג נאכט וועט פארקומען א מעמד קבלת פנים, און שבת קודש וועט דער רבי פראווענען די תפילות אין די חסידישע כולל יחיאל יהודה, וואו דער רבי וועט משמיע זיין פייערדיגע דברות קודש ביי שלש סעודות צום סיום ימי השובבי"ם.
אין לויף פון זונטאג און מאנטאג וועט דער רבי אויפנעמען דעם ציבור תושבי העיר לעצה ולברכה, און ארויפגיין לבתי נדיבים בעם לטובת די בארימטע קאשויער ישיבה המתנוסס לתפארה. מאנטאג אויפדערנאכט ליל ראש חודש אדר, וועט דער רבי שליט"א אפרעכטן דעם טיש לכבוד היום, אין שטוב פון הנגיד החסיד ר' בערל ווייס הי"ו, מיט די באטייליגונג פון א גרויסע ציבור תושבי העיר, און צומארגנס דינסטאג וועט זיך דער רבי שליט"א אומקערן אהיים למעון קדשו אין ניו יארק.
