חסידים ואנשי מעשה תושבי מאנטריאל נעמען אויף מיט גרויס פרייד די מעלדונג אז מען וועט האבן די זכיה מיטצוהאלטן א געהויבענע שבת בצל הקודש פון האחים האדמורי"ם מסקולען און ישועת יעקב סקולען שליט"א, בניו ממשיכי דרכו פון כ"ק אדמו"ר הרה"ק מסקולען זצ"ל וועלכער האט צענדליגע יארן מכהן געווען ברבנות אינעם עיר ואם בישראל מאנטריאל.
די ברידער האדמורי"ם שליט"א זענען אויפגעוואקסן אין מאנטריאל אין זייערע יונגע יארן, אויפן שויס פון זייער גרויסן פאטער דער רבי זצ"ל וועלכער איז געווען פון די חשובע רבני העיר, דינענדיג אלס רב ואב"ד אין ביהמ"ד מאור הגולה, ביזן איבערנעמען די כתר האדמורו"ת אין יאר תשע"ט, ווען דער רבי זצ"ל האט זיך געצויגן קיין בארא פארק למלא מקום אביו הגדול.
אצינד ווען מען גרייט זיך צום שמחת החתונה פון א אייניקל ביים רבי'ן זצ"ל, די כלה א טאכטער פון זיין עלטסטן איידעם הגה"צ ר' יואל מאסקאוויטש שליט"א, וועלכער האט איבערגענומען די רבנות אין ביהמ"ד מאור הגולה אין מאנטריאל, וועלן די ברידער האדמורי"ם שליט"א אנקומען אויף א געהויבענע באזוך לעיר מולדתם, און פראווענען דארט א שיינע שבת של שמחה בשבת אחים גם יחד.
אין זעקס וואכן ארום, תיכף נאכן יו"ט פורים הבעל"ט, וועלן די צוויי רבי'ס ארויספארן פון ניו יארק קיין מאנטריאל, און באשיינען די שמחת החתונה וואס קומט פאר דאנערשטאג פרשת כי תשא, שבת קודש וועט געפראוועט ווערן אויף א גרויסע פארנעם דורך די ברידער די רבי'ס אינאיינעם, די תפילות וועלן פארקומען אין ביהמ"ד מאור הגולה, און די טישן אין א גרעסערע לאקאל וואו עס איז ערווארטעט א ריזן ציבור תושבי העיר און פילע חסידים פון נאנט און ווייט.
אין אנדערע נייעס גרייט מען זיך אצינד אויף נאך א שבת של שמחה וואס וועט געפראוועט ווערן אין שפיץ פון די צוויי ברידער האדמורי"ם, ווען קומענדיגע וואך שבת קודש פרשת בשלח שבת שירה וועט געפראוועט ווערן אין וויליאמסבורג די שמחת האויפרוף פונעם חתן א זון ביי כ"ק אדמו"ר מישועת יעקב סקולען שליט"א, און כ"ק אדמו"ר מסקולען שליט"א וועט זיין צוגאסט אויף שבת אין וויליאמסבורג לכבוד די שמחה, און פראווענען די תפילות און טישן אינאיינעם מיטן ברודער דער בעל שמחה.
