ווי יאר יערליך וועט כ"ק אדמו"ר מסלאנים שליט"א אונטערנעמען א מסע הקודש קיין ניו יארק מחזק צו זיין קהל עדת צאן מרעיתו, די יעצטיגע נסיעה איז דעזיגנירט פאר די חסידים תושבי מאנסי, וואו דער רבי שליט"א וועט פראווענען א געהויבענע שבת ברוב עם הדרת מלך, אינעם גרויסן זאל פון תפארת עלקא, אין די נייע בנין פון בנות ישראל וויזניץ אויף סקול טערעס.
דער רבי שליט"א וועט זיך ארויסלאזן אין וועג קומענדיגן זונטאג פרשת יתרו י"ד שבט, באלד ביים אנקומען וועט דער רבי צופארן לבית האכסניא אין מאנסי, און דורכאויס די ימי הביקור וועלן די תפילות פארקומען אין סלאנימער בית המדרש אויף פיליס טערעס. מאנטאג אויפדערנאכט וועט פארקומען א מעמד קבלת פנים לכבודו פונעם רבי'ן, אין זאל פון בנות ישראל וויזניץ אויף 229 מעיפל, אינאיינעם מיט די שולחן הטהור לכבוד חמשה עשר בשבט.
דאנערשטאג אווענט וועט דער רבי שליט"א פארלערנען די וועכנטליכע שיעור אין אור החיים הק', אין זאל פון בנות ישראל וויזניץ אויף מעיפל, און דערנאך וועט געפראוועט ווערן די געהויבענע שבת אין זאל פון תפארת עלקא, וואו עס איז ערווארטעט הונדערטער סלאנימער חסידים פון איבער גרעיטער ניו יארק און ניו דזשערזי.
דינסטאג פרשת משפטים איידער דער רבי לאזט זיך ארויס אויפן וועג צוריק קיין ארץ ישראל, וועט פארקומען א מעמד צאתכם לשלום וואו די חסידים וועלן זיך געזעגענען, אין זאל פון בנות ישראל וויזניץ אויף מעיפל.
