מיט גרויס צער איז אנגעקומען די שווערע בשורה איבער די פטירה בשיבה טובה פון הרבנית הצדיקת ממודזיץ ע"ה, מחברתו הטהורה פון כ"ק אדמו"ר הרה"ק בעל נחלת דן ממודזיץ זי"ע, וועלכער איז נפטר געווארן היינט צופרי אין עלטער פון צוויי און ניינציג יאר.
די רעבעצין הרבנית בילא רחל טאוב ע"ה, איז געווען א טאכטער פון הרה"צ ר' שמואל אהרן שעדראוויצקי זצ"ל מביאליסטאק, א אייניקל פון פריערדיגע צדיקים וקדושי עליון. יארן לאנג איז זי צוגעשטאנען צו די רעכטע האנט פון איר גרויסער מאן דער רבי זכר צדיק לברכה, און זוכה געווען אויפצושטעלן א הערליכע דור ישרים יבורך, ווען אין שפיץ שטייען די צוויי זיהן את שני המאורות הגדולים, כ"ק אדמו"ר ממודזיץ שליט"א, און כ"ק אדמו"ר מקוזמיר שליט"א.
די לוויה איז פארגעקומען היינט פרייטאג נאכמיטאג ברחובות העיר בני ברק, צוערשט ביי ביהמ"ד קוזמיר, דערנאך ביי ביהמ"ד הגדול מודזיץ, וואו עס האבן זיך באטייליגט הונדערטער חסידים ואנשי מעשה. בפניא דמעלי שבתא אין ארץ ישראל איז די רעבעצין געקומען לקבורה אויפן הר הזיתים חלקת פוילין, נעבן איר גרויסן מאן דער מודזיצער רבי זצ"ל.
די קינדער כ"ק האדמורי"ם ממודזיץ און קוזמיר שליט"א וועלן זיצן שבעה די קומענדיגע טעג, בביתו נאוה קודש פונעם פאטער דער רבי זצ"ל בבית הנפטרת, בבנין ביהמ"ד מודזיץ אויף רחוב חבקוק אין בני ברק.
