דעם ערב שבת הייבט זיך אן א נייע סדר הלימוד פאר כלל תלמידי וחסידי חצר הקודש קאסוב, שטייענדיג דריי חדשים נאכן הסתלקות פון כ"ק אדמו"ר הרה"ק מקאסוב זצ"ל, וועלכער האט איבערגעלאזט א לעכטיגע ירושה, פילע ספרים וואס שיינט אריין א ליכטיגע אור בתורת החסידות.
אויפן גוטהייסונג פון אלע קינדער פון רבי'ן זצ"ל, ובראשם כ"ק אדמו"ר מקאסוב שליט"א וועלכער האט אויסגעדרוקט זיין פולע שטיצע דערצו, איז אוועקגעשטעלט געווארן א ספעציעלע סדר הלימוד אין וואס די חסידים וועלן עוסק זיין אין די הייליגע ספרים פונעם רבי'ן זצ"ל, דורכטון משנתו הטהורה און דערמיט אנהאלטן דעם קשר מיטן אומפארגעסליכן רבי'ן זצ"ל.
די סדר הלימוד הייבט זיך אן דעם ערב שבת קודש פרשת כי תצא, ווען יעדע ערב שבת און שבת קודש וועט מען לערנען צוויי שטיקלעך אין ספה"ק שבת מלכא קדישא, וואו דער רבי רעדט ארום איבער די גרויסקייט און קדושת השבת. א ספעציעלע לוח איז אהערגעשטעלט געווארן פאר די קומענדיגע יאר צייט, צו ענדיגן דעם גאנצן ספר לקראת די ערשטע הילולא קדישא.
נאך די ימים טובים הבעל"ט, וועט די סדר הלימוד פארברייטערט ווערן מיט א ספעציעלע סדר לימוד טאג טעגליך אין די אנדערע ספרים פונעם רבי'ן, עבדא דמלכא און מעיינא דמלכא.
