טויזענטער חסידי וויזניץ די בכל אתר ואתר טוען מתפלל זיין לרפואתו השלימה פון רבם ומאורם כ"ק אדמו"ר מוויזניץ שליט"א, וועלכער גייט אריבער א סעריע באהאנדלונגען שוין פאר עטליכע חדשים, און מען האפט אז די פעולות רפואה זאלן עושה רושם זיין, און דער רבי שליט"א זאל צוריקקומען צו די כוחות ווי אמשנעלסטן.
דער רבי שליט"א וועלכער ליידט פון די ביטערע מחלה ה"י, האלט זיך אויף אין די יעצטיגע תקופה אין שטאט נתני' אויף א פארמאכטע פארנעם, אין די לעצטע פאר וואכן איז דער רבי אריינגעקומען קיין בני ברק פראווענען יעדן צווייטן שבת, און כסדר געקומען משפיע זיין אויף די חסידים פונדערנאנט.
דעם זאת חנוכה ביים טיש האט דער רבי שליט"א אדרעסירט זיין געזונט צושטאנד, זאגענדיג אז מען קען נישט וויסן וואס די קומענדיגע וואכן וועלן ברענגען, אין די צייט וואס ער איז ווייטער אנגעוויזן אויף באהאנדלונגען, און אזוי אויך ווייסט ער נישט אויב ער וועט זיך קענען באטייליגן ביי די שמחות במעון קדשו אין די נאנטע צוקונפט. דערביי האט דער רבי אפעלירט צו די חסידים מען זאל דאווענען לרפואתו השלימה, און אינזין האבן ביים לערנען און דאווענען עס זאל זיין לרפואת מרן ישראל בן לאה אסתר בתוך שאר חולי ישראל.
היינט ערשיינט א ספעציעלע בריוו מטעם די בית דין צדק ובית הוראה אין קרית וויזניץ בני ברק, אונטערגעשריבן דורך די חברי הביד"ץ ורבני הקהילה, הגאון הגדול רבי משה שאול קליין שליט"א, הגאון ר' יעקב מאיר שטערן שליט"א דומ"ץ וויזניץ, הגאון ר' שרגא פייוויל וויינבערגער שליט"א, הגאון ר' ישראל מיללער שליט"א, און הגאון ר' יצחק אייזיק טוביאס שליט"א. אינעם בריוו שרייבן זיי די חוב קדוש וואס ליגט אויף יעדן חסיד צו מתפלל זיין פארן רבי'ן גענוי ווי מען דארף דאווענען פאר די אייגענע עלטערן, און יעדער זאל זיך מקבל זיין א קבלה אדער א הנהגה טובה לזכותו פונעם רבי'ן. אזוי אויך זאל מען יעדן טאג נאכן דאווענען זאגן קאפיטל ס"א אין תהלים, און דערנאך א מי שברך פארן רבינ'ס געזונט.
