חסידי ומעריצי חצר הקודש לעלוב אין ניו יארק, נעמען אויף מיט פרייד די מעלדונג מטעם בית כ"ק אדמו"ר מהרי"ד מלעלוב שליט"א, אז דער רבי שליט"א וועט ארויספארן קומענדיגע וואך אויף א מסע הקודש קיין ניו יארק, מאציל זיין מהודו והדרו אויף די חסידים ומעריצים, און פארוויילן פאר צוויי וואכן אינאיינעם מיט די חסידים תושבי ניו יארק והגלילות.
דער רבי שליט"א וועלכער קומט יאר יערליך קיין אמעריקע מחזק צו זיין די חסידים, וועט ארויספארן ממעון קדשו אין ירושלים קומענדיגן זונטאג פרשת יתרו, אנקומענדיג קיין ניו יארק וועט דער רבי צופארן קיין וויליאמסבורג, וואו דער רבי וועט זיך אויפהאלטן דורכאויס די ערשטע פאר טעג פון די באזוך, בבית האכסניא אין שטוב פון הנגיד החסיד ר' יודל זילבער הי"ו.
דעם ערשטן שבת פרשת יתרו שבת קבלת התורה, וועט דער רבי פראווענען אויף א גרויסע פארנעם אין שטאט מאנסי, אין די נייע פראכטפולע בנין פון ישיבה ומתיבתא בית שרגא אויף סעדל ריווער, די אכסניא אין מאנסי וועט זיין אין שטוב פון הנגיד החסיד ר' צבי פרץ באדאנסקי הי"ו. אין די יעצטיגע טעג ווערן אויסגעארבעט די גענויע דעטאלן איבער די צווייטע וואך פונעם געהויבענעם באזוך, און אזוי אויך אין וועלכע שטאט דער רבי שליט"א וועט פירן דעם צווייטן שבת פרשת משפטים הבעל"ט.
