דאס יהדות הגולה נעמט אויף מיט פרייד די נייעס פון ירושלים עיר הקודש, אז מרן ראש הישיבה הגאון הגדול רבי שאול אלתר שליט"א גרייט זיך אונטערצונעמען א מסע הקודש קיין אמעריקע, מיטן ציהל אויפצוטרייבן שטיצע למען השלמת המקח פאר די ביהמ"ד הגדול פון קהל פני מנחם אין ירושלים, וואס איז לעצטנס גענצליך אריבער לרשות גבוה אונטער די אייגענטום פון די קהילה קדושה.
די מסע הקודש וואס וועט פארקומען אין לויף פון די וואכן פון פרשת משפטים און תרומה, וועט ארייננעמען ביקורי קודש אין עטליכע שטעט לענגאויס די פאראייניגטע שטאטן, א צוויי טאגיגע באזוך אין לאס אנדזשעלעס, א באזוך פון איין טאג אין בארא פארק, א געהויבענע און ערשטמאליגע שבת אינעם עיר התורה והחסידות לעיקוואד, און א צוויי טאגיגע באזוך אין שטאט באלטימאר אין מערילענד.
מוצאי שבת קודש פרשת יתרו באישון ליל וועט דער ראש ישיבה ארויספארן ממעון קדשו אין ירושלים אונטערוועגנס קיין אמעריקע, זונטאג צופרי וועט ער אנקומען קיין לאס אנדזשעלעס, און פאר די נאכפאלגענדע צוויי טעג ארויפגיין לבתי נגידים בעם צו מתרים זיין די נדיבי לב לטובת די קרן הבנין פון די ביהמ"ד. אזוי אויך וועט פארקומען עטליכע שיעורים אין לאקאלע ישיבות און כוללים.
מיטוואך פרשת משפטים כ"א שבט וועט דער ראש ישיבה אנקומען צוגאסט קיין ניו יארק, און וויילן אינעם עיר ואם בישראל בארא פארק ביז דאנערשטאג אינמיטן טאג. מיטוואך נאכט וועט פארקומען א גרויסע כינוס פאר כלל חסידיו ומעריציו, און דאנערשטאג וועט זיין ספעציעלע זמני קבלת קהל אריינצוגיין אל הקודש פנימה.
שבת קודש פרשת משפטים, מברכים חודש אדר, וועט דער ראש ישיבה פראווענען אין שטאט לעיקוואד צום ערשטן מאל, פרייטאג צונאכטס און שבת אינדערפרי וועט זיין געווידמעט פאר א ענגע צאל מקורבים און גרויסע פילאנטראפן, און שלש סעודות וועט געפראוועט ווערן אויף א גרויסע פארנעם מיט די באטייליגונג פון טויזענטער אידן, אין חצר פון ביהמ"ד פני מנחם אין שטאט.
זונטאג פרשת תרומה וועט דער ראש ישיבה פארזעצן די נסיעה קיין באלטימאר, און ווידער אפרעכטן א רייע מסיבות לטובת די בית המדרש אין ירושלים, און לויטן פלאן וועט זיך דער ראש ישיבה אומקערן אהיים קיין ארץ ישראל דינסטאג פרשת תרומה.
ווי באקאנט האט דער ראש ישיבה ערהאלטן א פערזענליכע איינלאדענונג פונעם הויכגעשעצטער פרעזידענט פון אמעריקע דאנאלד טראמפ, און ווי עס ווערט איבערגעגעבן איז פארהאן א שטארקע מעגליכקייט אז די היסטארישע באגעגעניש וועט פארקומען ערגעצוואו אין די יעצטיגע ימי הביקור אין אמעריקע.
