מיט גרויס פרייד ווערט אויפגענומען די בשורה טובה ביי כלל חסידי ראחמיסטריווקא, איבער א געלונגענע מקח וואס איז ב"ה אונטערגעקומען ביי די ראחמיסטריווקא מוסדות אין לעיקוואד, און בשעה טובה ומוצלחת איז די הנהלת התלמוד תורה אריין אין קאנטראקט אפצוקויפן א גיגאנטישע שטח וואו עס וועט ווערן אויפגעבויעט א שפאגל נייע בנין התלמוד תורה.
די ראחמיסטריווקא תלמוד תורה "זכר יוחנן" בליהט און וואקסט דורכאויס די לעצטע פאר יאר, און די נויט צו זיך קובע זיין אין א אייגענעם בנין מיט הרחבת הדעת האט זיך אנגעזעהן אויף טריט און שריט, אצינד איז אונטערגעקומען א גאר פאסיגער מקח ווען עס איז ארויסגעשטעלט געווארן צום פארקויפן א גרויסן שטח אויף פראספעקט סטריט, וואס פארמאגט שוין די יסודות פאר א נייע געביידע און די נויטיגע פערמיטן צו בויען ווייטער.
די גרויסע שטח וואס נעמט אריין דריי און א האלב אקער לאנד, איז שוין אריין אין קאנסטרוקציע א שטיק צייט צוריק, און אצינד איז עס געשטאנען צום פארקויפן. די הנהלת המוסדות דארף נישט ארבעטן יעצט אויף נייע פערמיטן, נאר מען קען פאראויסגיין מיט די בוי ארבעט און ארויפציען א הערליכע געביידע וואס וועט ארייננעמען פינף און דרייסיג קלאס צימערן, א גרויסע בית המדרש און א חדר אוכל, מיט אלע זייטיגע באדערפענישן וואס פעלט זיך אויס פאר א בית גדול שמגדלין בו תינוקות של בית רבן לתורה ועבודה.
