היינט מיטוואך ווערט געמאלדן איבערראשנדע נייעס פאר כלל חסידי בעלזא אין אמעריקע, אז מיטן אויבערשטנס הילף ווערט געבויעט א שפאגל נייע שטאט פאר בעלזא חסידים אין אמעריקע, א נייער עיר ואם בישראל וואס איז ערווארטעט צו ברעכן היסטאריע און איבערשרייבן די מאפע פון חרדישע געגנטער אין ניו יארק און ניו דזשערזי, א שטאט וואס וועט זיין א ריכטיגע און געשמאקע ארט פאר בעלזא חסידים און פיל אנדערע, זיך צו איינקוואטירן בקביעות אין א היימישע אטמאספערע.
די נייעס ווערט געמאלדן אין די באקאנטע "המחנה" אויסגאבע, וואס ערשיינט וועכנטליך דורך בעלזא חסידים אין אמעריקע, און מיט גרויס פרייד ווערט אצינד געמאלדן די איבערראשנדע בשורה וואס ברענגט אויף גאר שטארקע פרייד און עקסטאז ביי כלל חסידי בעלזא, און בפרט ביי די טויזענטער חסידים וואס וואוינען צושפרייט אין די צענטראלע היימישע שטעט אין ניו יארק און ניו דזשערזי.
די נייע ישוב ווערט געבויעט בשכינות צו די עקזיסטירנדע אידישע שטעט אין ניו יארק און ניו דזשערזי, און האלט שוין טיף אינמיטן די בוי ארבעט, די עסקנים ארבעטן שוין דערויף צוויי יאר, אין שפיץ פון א ספעציעלע וועד וואס ווערט באגלייט דורך הגה"צ ר' אהרן מרדכי רוקח שליט"א בנו יחידו פון כ"ק אדמו"ר מבעלזא שליט"א, וועלכער איז שטארק אקטיוו אין די נאכאנאנדע פארשריט און בוי ארבעט.
ווי די עסקנים זאגן האפט מען שוין צו קענען באנייען דעם ישוב "קרית בעלזא ארה"ב" ביז צוויי דריי יאר, ווען עס וועלן גרייט ווערן די ערשטע הונדערטער דירות אריינצונעמען בעלזא חסידים און נאך פיל אנדערע מיט הרחבת הדעת, עס נעמט אריין א גיגאנטישע שטח פון העכער צוועלף הונדערט אקער לאנד, און נאך פופצן הונדערט אקער לאנד איז אין קאנטראקט דורך די עסקני הקריה, און כדי צו פארזיכערן די מאקסימום סוקסעס האלט מען די לאקאציע סמוי מן העין.
