א פרישע שריט פון הרחבת גבולי הקדושה איז געמאכט געווארן אין די טעג, בתוככי עיר הצדק קרית יואל, ווען די הנהלת הקהילה האט אין מזל'דיגע שעה געשלאסן מקח אויף א נייע שטח רחבת ידים אין שכונת זרע קודש, וואו עס וועט בעז"ה אויפגעבויעט ווערן א שפאגל נייע בית המדרש גדול ומפואר, נאכצוקומען די בליה און וואוקס וואס די געגנט לעבט מיט ב"ה אויף א רעגלמעסיגע פארנעם.
די נייע שטח ביים ווינקל פון דאללאס און פארט ווארט פלעיס, איז אצינד אריבער אונטער די אייגענטום פון די קהילה קדושה, וואס וועט אויפבויען דארט א גרויסע בית המדרש, א לופטיגע היכל מיט הונדערטער פלעצער, א גרויסע מקוה און שטיבלעך צום דאווענען, שמחה זאלן און א היכל התורה, און אלעס וואס פעלט זיך אויס פאר א פארנומענע חסידישע בית המדרש מיט לומדים און מתפללים.
א מסיבת לחיים איז פארגעקומען דעם מוצאי שבת ויגש צום גרויסן דערגרייכונג, בביתו נאוה קודש פון כ"ק אדמו"ר מסאטמאר שליט"א, וואו עס האבן זיך באטייליגט פילע תושבי השכונה, אין שפיץ פון הרה"ג ר' יואל אפענהיים שליט"א דומ"ץ הביהמ"ד און הגה"צ ר' יואל האלבערשטאם שליט"א רב ביהמ"ד בית שמואל דקהל יטב לב ד'סאטמאר אין די אומגעגנט. עס האט אויפגעטרעטן הנגיד החסיד ר' דוד עקשטיין הי"ו ראה"ק, און הרב החסיד ר' טובי' ליפא גראס הי"ו אין נאמען פון די וועד קרן הבנין. מען האט געזינגען ניגוני שבח והודאה, און דער רבי שליט"א האט אויפגעטרעטן מיט קורצע דברות קודש מען זאל קענען ווי שנעלער זעהן דעם נייעם ביהמ"ד עומד על תילה בנויה לשם ולתפארה.
