היינט מאנטאג פארטאגס איז כ"ק אדמו"ר מפינסק קארלין שליט"א אנגעקומען אויף א לענגערע נסיעה קיין אמעריקע, וואו דער רבי וועט זיך אויפהאלטן אין לויף פון צוויי וואכן צו אויפטרייבן גרויסע געלטער, למען החזקת מוסדותיו הקדושים בארץ הקודש על טהרת הקודש.
דער רבי שליט"א האט געלאנדעט בשערי ניו יארק היינט פארטאגס, און איז תיכף צוגעפארן קיין וויליאמסבורג וואו עס וועט פארקומען א רייע מסיבות לטובת די מוסדות בבתי נגידים בעם. בעפאר שבת קודש וועט דער רבי ארויספארן קיין קרית יואל, און פראווענען דעם שבת אויף א פארמאכטע פארנעם אין די וואודבארי דזשאנקשען געגנט.
נאך שבת וועט דער רבי אנקומען קיין מאנסי, און זיך דארט אויפהאלטן פאר עטליכע טעג, צו מתרים זיין די ארטיגע נדיבי לב, די צווייטע שבת אין אמעריקע, שבת פרשת שמות, וועט דער רבי פראווענען אין שטאט מאנסי, אויך אויף א פריוואטע פארנעם, און דערנאך וועט דער רבי אנקומען פאר עטליכע טעג קיין לעיקוואד צו אויפטרייבן פרישע געלטער לטובת די מוסדות.
נעכטן זונטאג פארמיטאג איז דער רבי שליט"א אנגעקומען אויף א באזוך אין שטוב פון ידידו ורעו הגה"צ ר' יעקב מאיר שעכטער שליט"א, אפצונעמען ברכת קדשו לקראת די נסיעה, דער רבי האט געבעטן א ברכה צו קענען האבן ישוב הדעת און נשיאות חן דורכאויס די נסיעה, און די צוויי גדולים האבן זיך געזעגנט לשלום.
