די נאכט איז נפטר געווארן דער לעגענדארער משמש בקודש בחצר הקודש פשעווארסק, הרב החסיד ר' שמואל ברוך נאה ז"ל, וועלכער האט זוכה געווען פאר צענדליגע יארן נאכאנאנד צו זיין דער משמש בקודש ביי צדיקי בית פשעווארסק, צוערשט ביי הרה"ק רבי יענקעלע מפשעווארסק זי"ע, און שפעטער ביי להבחל"ח כ"ק אדמו"ר מפשעווארסק שליט"א לאורך ימים ושנים טובים.
הרב החסיד ר' שמואל ברוך ע"ה איז געבוירן יו"ט חנוכה תרצ"ט, צו זיין טאטע הרב החסיד ר' חנני' יו"ט ליפא נאה ז"ל, אלס בחור האט ער געלערנט אין ישיבת חכמי לובלין ביי הגה"ק בעל שבט הלוי זצ"ל, און נאך די חתונה האט ער אוועקגעשטעלט זיין שיינעם שטוב אין אנטווערפן.
נאכן הסתלקות פון הרה"ק רבי איציקל מפשעווארסק זי"ע, איז ר' שמואל ברוך געווארן אויפגענומען אלס גבאי ביי ממלא מקומו הרה"ק רבי יענקעלע זי"ע, צענדליגע יארן האט ער געטון זיין תפקיד בנאמנות, געשריבן די קוויטלעך און געדאווענט פארן עמוד, מיט זיין הארציגע קול האט ער מהנה געווען די חסידים ביי די תפילות און טישן, און ספעציעלע מעמדים אין הויף. זיין פערזענליכקייט איז געווען שטארק געשעצט און ארויפגעקוקט ביי אלע חסידים, וואוסענדיג אז עס רעדט זיך פון א געהויבענער חסידישער איד משכמו ולמעלה.
נאכן הסתלקות פון הרה"ק רבי יענקעלע זי"ע האט ער ווייטער אנגעהאלטן זיין תפקיד בנאמנות אלס משמש בקודש ביי להבחל"ח כ"ק אדמו"ר מפשעווארסק שליט"א, אבער ליידער איז ער אין די לעצטערע יארן געווען אין א שוואכן געזונט צושטאנד, און האט נישט געהאט די מעגליכקייט צו זיין דער גבאי, א תפקיד וואס איז ערפילט געווארן דורך זיינע קינדער און די אנדערע משמשים בקודש.
ליידער האט ער מיטגעמאכט שווערע צייטן אויך, ווען זיין זון הרב החסיד ר' משה יצחק נאה ע"ה הי"ד איז טראגיש אומגעקומען אין א אנטיסעמיטישע אטאקע, מיט איבער צוואנציג יאר צוריק.
די לוויה איז פארגעקומען היינט דינסטאג מיטאג פארנט פון די בנין הקהילה מחזיקי הדת, וואו הגה"צ ר' אהרן שיף שליט"א גאב"ד אנטווערפן האט מספיד געווען. דערנאך איז פארגעקומען די לוויה פארנט פון ביהמ"ד פשעווארסק אין אנטווערפן, וואו כ"ק אדמו"ר מפשעווארסק שליט"א האט אויפגעטרעטן מיט קורצע דברי הספד, און ארויסגעברענגט זיין געוואלדיגע געטריישאפט, און די הכרת הטוב וואס דער טאטע זצ"ל בגנזי מרומים וועט אים זיכער אקעגן קומען. פון דארט איז די לוויה געפירט געווארן צום בית החיים אין פיטע האלאנד, וואו ער איז געברענגט געווארן למנוחה נכונה סמוך ונראה צום ציון הק' פון צדיקי בית פשעווארסק זי"ע.
