דעם שבת פרשת ויגש איז נפטר געווארן אינעם ווייטן מעלבארן אין אסטראליע, הרבנית הצדיקת מרת בילא בעק ע"ה, אלמנתו ומחברתו הטהורה פון הגה"צ המפורסם רבי אברהם צבי הלוי בעק זצ"ל גאב"ד מעלבארן, אין טיפן עלטער פון דריי און ניינציג יאר, איבערלאזנדיג א הערליכע דור ישרים יבורך בנין וחתנין רבנן.
די רעבעצין ע"ה איז געווען א טאכטער פון הגאון החסיד ר' משה צבי האפמאן ז"ל, און א שוועסטער פון הגאון הצדיק ר' אהרן גדלי' האפפמאן זצ"ל גאב"ד בודאפעסט. אין יאר תשי"ד האט זי חתונה געהאט מיט איר גרויסן מאן, וועלכער איז געווען פון די גאר נאנטע און חשוב'סטע תלמידים פון כ"ק אדמו"ר הרה"ק בעל אמרי חיים מוויזניץ זצ"ל. די ערשטע תקופה נאך די חתונה האבן זיי געוואוינט אין קרית וויזניץ בני ברק, ביז צען יאר נאך די חתונה ווען איר חשובער מאן דער רב זצ"ל איז געווארן אויפגענומען אלס רב אין שטאט מאנטיוואדעיא אין אורוגוואי.
אין יאר תשמ"ח האבן זיי זיך געצויגן קיין אסטראליע, וואו דער רב זצ"ל איז געווארן אויפגענומען אלס רב פון די חרדישע קהילה עדת ישראל, זייענדיג מכהן ברבנות העכער דרייסיג יאר כולן שוין לטובה, ביז צו זיין פטירה אין חודש תמוז תשע"ח. די רעבעצין ע"ה איז פארבליבן דארט אין אסטראליע, ביז דעם שבת קודש ווען זי איז נפטר געווארן לחיי העולם הבא בשיבה טובה.
די רעבעצין ע"ה לאזט איבער א הערליכע דור, חשובע קינדער און אייניקלעך רבנים ומורי הוראה, די קינדער הגה"צ ר' חיים יודא בעק שליט"א אדמו"ר מטשערקאס, הגה"צ ר' בערל בעק שליט"א אבד"ק מאדא, און הגה"צ ר' ברוך בעק שליט"א פון וויליאמסבורג. די איידימער זענען כ"ק אדמו"ר מנחלת אהרן שליט"א, הגה"צ ר' יהודה כ"ץ שליט"א גאב"ד ויצב אברהם אין מעלבארן, הגה"צ ר' יוסף לייפער שליט"א מטעמעשוואר ירושלים, און הגה"צ ר' שלמה אלימלך כ"ץ שליט"א זון פון כ"ק גאב"ד טאהש מאנסי שליט"א.
די לוויה איז פארגעקומען היינט זונטאג אינדערפרי אין מעלבארן אסטראליע, און מארגן מאנטאג וועט פארקומען די לוויה אין ארץ ישראל.
