א מערקווירדיגע געשיכטע ווערט אויפגעדעקט די טעג, שטייענדיג נאך די פטירה בשיבה טובה פון הרב החסיד ר' נפתלי כהן ז"ל פון בני ברק, א געשיכטע וואס שפיגלט אפ די איידלקייט און מידות טובות פון ר' נפתלי, און די שטארקע רצון פון להבחל"ח כ"ק אדמו"ר מסקווירא שליט"א צו שליסן א רייכע קאפיטל פון אביו הגדול הרה"ק מסקווירא זי"ע.
די מעשה גייט צוריק מיט זעכציג יאר בשנת תשכ"ו, ווען כ"ק אדמו"ר הרה"ק מסקווירא זי"ע האט באשטעלט תפילין פאר זיינ'ס א פלומעניק, הרב אהרן טווערסקי שליט"א פון ירושלים, וועלכער איז א אייניקל פון זיין פאטער הרה"ק רבי דוד'ל מסקווירא זי"ע.
דער סקווירא רבי זי"ע האט זיך שטארק געזארגט פאר אלע משפחה מיטגלידער, און האט געוואלט באשטעלן די סאמע מהודר'סטע תפילין פאר זיין פלומעניק, די פרשיות האט ער באשטעלט ביים באקאנטן סופר הרב הגאון ר' נחמן פפירנא ז"ל מיקירי קרתא דשופריא, און די בתים האט ער באשטעלט ביי הרב החסיד ר' נפתלי כהן ז"ל מגדולי חסידי סקווירא, וועלכער איז געווען אדוק ומקושר צום סקווירא רבי'ן זצ"ל נאך פון בוקארעסט.
קענענדיג ר' נפתלי אלס א ריכטיגער ירא שמים, וואס האט עוסק געווען צו פאבריצירן בתים פאר תפילין מיט א זעלטענע עבודה מיט די אייגענע הענט, האט דער סקווירא רבי זי"ע דווקא געוואלט האבן די בתים פון ר' נפתלי, און דער משמש בקודש הרב החסיד ר' ישעי' אונגאר ע"ה האט אפגעשיקט א בריוו אין נאמען פונעם רבי'ן, דירעקט צו ר' נפתלי אינדערהיים אין ארץ ישראל, אז ער זאל צוגרייטן די בתים בשליחות הקודש פונעם רבי'ן.
עס איז אריבער א תקופה און דער גבאי ר' ישעי' האט גארנישט צוריקגעהערט, האט ער געשיקט נאך א בריוו צו ר' נפתלי, און צו זיין גרויס וואונדער האט ער נישט באקומען קיין ענטפער, ווען די טעלעפאנישע פארבינדונגען איז נאכנישט געווען אקטועל דעמאלטס.
שטייענדיג שוין קארגע צוויי וואכן בעפאר די זמן הנחת תפילין, האט ר' ישעי' זיך פארבינדן צו א באקאנטע סקווירא חסיד אין ארץ ישראל, און אים געבעטן אריבערצופארן צו ר' נפתלי כהן און זיכער מאכן אז ער גרייט צו די בתים, ווי פארשטענדליך האט דער גבאי ר' ישעי' אויסגעדרוקט גרויס וואונדער אינעם בריוו, אויף דעם וואס ר' נפתלי מאכט זיך נישט צוטון פון די בריוון פונעם רבינ'ס שטוב, און עס זעהט אויס אז ער איז נישט אזא שטארקע חסיד פונעם רבי'ן.
למעשה האט ר' נפתלי דאן באקומען די בקשה, און זיך באלד גענומען צו די ארבעט אהערצושטעלן די בתים, וויבאלד עס איז געווען גאר נאנט צום תפילין לייגן, און ער האט שוין נישט געהאט די מעגליכקייט צוצוגרייטן נייע בתים, איז ער ארויף צו איינער פון די גדולי ישראל פאר וועם ער האט דאן צוגעגרייט בתים, און געבעטן רשות עס אפצושטופן מיט עטליכע חדשים, כדי ער זאל קענען שענקן די דאזיגע בתים פאר א בר מצוה בחור וואס האט נאך בכלל נישט קיין תפילין.
אכט און פופציג יאר איז אדורך זינט דאן, און מיט צוויי יאר צוריק איז ארויסגעשטעלט געווארן אויף ליציטאציע א פעקל בריוון פון הרה"ק מסקווירא זי"ע, דורך דער באקאנטער אנטיק סוחר הרב החסיד ר' מאיר יחיאל קנאבלאך הי"ו פון שיכון סקווירא, צווישן די בריוון איז ארויסגעשטעלט געווארן צום פארקויפן אט דער בריוו ווי דער גבאי ר' ישעי' דרוקט זיך אויס מיט וואונדער אויף די נאמנות פון ר' נפתלי כהן צום סקווירא רבי'ן, און פילע אידן וואס האבן געזעהן דעם בריוו האבן זיך שטארק געוואונדערט דערויף.
איינער פון די אייניקלעך פון ר' נפתלי, הרב הגאון ר' יעקב יוסף כהן שליט"א מדייני סקווירא, און ראש כולל שטעפינעשט אין בני ברק, האט זיך שטארק געוואונדערט זעענדיג דעם בריוו, ער איז ארויף צום שטוב פון זיין זיידן הרב החסיד ר' נפתלי כהן ז"ל וועלכער איז שוין דאן געווען נאנט צו די הונדערט יאר, אבער ער איז געווען בצלילות הדעת, און ער האט פארגעלייגט די שאלה פארן זיידן ר' נפתלי.
ר' נפתלי האט געגעבן א שמייכל און זיך אנגערופן אז עס איז בסך הכל געווען א פשוטער טעות, עס איז געווען צוויי נפתלי כהן'ס, וויבאלד ער האט געהאט א ערשטע קאזין מיטן זעלבן נאמען, און די ערשטע צוויי בריוון פון ר' ישעי' איז אנגעקומען צו יענעם קרוב, וויבאלד ר' ישעי' האט געהאט די נישט ריכטיגע אדרעס...
ר' נפתלי האט אויסגעפירט, אז זיין קרוב ר' נפתלי האט אוועקגעלייגט די בריוון וויבאלד ער האט זיך פארגעשטעלט אז עס דארף אנגעקומען צום אנדערן נפתלי, למעשה האט זיך עס פארשלעפט, און ביזדערווייל האט ר' נפתלי באקומען א דירעקטע שליחות פונעם סקווירא חסיד, ווען ר' ישעי' גבאי האט געשיקט ספעציעל צו ר' נפתלי, און ער האט טאקע באלד אויפן פלאץ געמאכט די בתים ווי דערמאנט.
ר' נפתלי האט ווייטער דערציילט, אז א שטיק צייט שפעטער האט ער זיך נאכאמאל געטראפן מיט זיין קרוב ר' נפתלי, וועלכער האט אים פארציילט אז ער האט באקומען א קאנווערט מיט דריי הונדערט דאללער, געשיקט פונעם סקווירא רבי'נס שטוב, און אויסגעדרוקט וואונדער אז ער האט נישט געוואוסט אז דער סקווירא רבי פארמאגט אזויפיל געלט צו טיילן לכבוד יו"ט.
ר' נפתלי האט גלייך פארשטאנען אז די דריי הונדערט דאללער איז א באצאלונג פאר די בתים, און אז ר' ישעי' גבאי האט עס ווידער געשיקט צום נישט ריכטיגן אדרעס, אבער נאכן טראכטן אז זיין קרוב האט שוין מעגליך גענוצט די געלט פאר אייגענע הוצאות, מיינענדיג אז דאס האט דער סקווירא רבי געשיקט פאר אים לכבוד יו"ט, האט ער געמאכט א שווייג און קיינמאל נישט פארלאנגט דאס געלט פאר די בתים.
יעצט נאכן פטירה פון הרב החסיד ר' נפתלי כהן ז"ל, ווען עס איז פארשפרייט געווארן די געשיכטע וואס צייגט אויף די געוואלדיגע מידות און איידלקייט פונעם חשובן נפטר, האט כ"ק אדמו"ר מסקווירא שליט"א געהערט די מעשה מיט שטארק אינטערעסע, ער האט באלד זיך נאכגעפרעגט ביי די קינדער די גענויע פרטים, און דער רבי שליט"א האט געהייסן אפשיקן פיר טויזענט דאללער פאר די יורשים, כדי צו באצאלן פאר די בתים, אויף וואס ר' נפתלי האט אין פאקט קיינמאל נישט באקומען באצאלט!
