חסידי ומעריצי בית קרעטשניף נעמען אויף מיט פרייד די מעלדונג מטעם בית כ"ק אדמו"ר מקרעטשניף שליט"א פון י"ם, אז דער רבי שליט"א וועט בעז"ה מופיע זיין בשערי ניו יארק אויף א געהויבענע שמחה'דיגע באזוך, לפאר על ראש שמחתו ביים שמחת החתונה פון א אייניקל, און צום הויכפונקט פון די נסיעה וועט דער רבי שליט"א פראווענען א גרויסע שבת של שמחה בעיר ואם בישראל וויליאמסבורג.
דער רבי שליט"א קומט צו פארן באשיינען די שמחת החתונה פון א אייניקל, די חתן א זון פון זיין זון הגה"צ ר' מאיר איתמר ראזענבוים שליט"א, איידעם ביי הגה"צ אבד"ק אודווארי שליט"א, מיט די כלה א טאכטער פון הגה"צ ר' משה פאנעט שליט"א אדמו"ר מדעעש לעיקוואד, איידעם ביי הגה"צ ר' מרדכי בצלאל קליין שליט"א דומ"ץ סאטמאר לעיקוואד.
די חתונה איז באשטימט פארצוקומען מאנטאג פרשת תצוה ו' אדר, אין די פאונטען באללרום זאל אין שטאט לעיקוואד, און שבת קודש פרשת תרומה שבת אויפרוף וועט דער רבי פראווענען דעם שבת בעיר ואם בישראל וויליאמסבורג, וואו עס איז ערווארטעט א גרויסן ציבור מיטצוהאלטן דעם שבת בצל הקודש.
דער רבי שליט"א וועט שוין אנקומען קיין ניו יארק אנהייב וואך פרשת תרומה, און דורכאויס די ימי הביקור באשיינען א רייע מסיבות און מעמדים לטובת ישיבתו הק' מבצר התורה קרעטשניף אין אלעד, אויף שבת קודש איז ארויסגעדינגען געווארן די פראכטפולע חתונה זאל "גינת אסתר" וואו עס וועט געפראוועט ווערן די תפילות און טישן ברוב עם, דערנאך וועט דער רבי פארבלייבן דאהי ביז מיטוואך פרשת תצוה, ווען דער רבי וועט זיך ארויסלאזן אויפן וועג צוריק אהיים קיין ארץ ישראל.
