נאך צוועלף יאר זינט הגה"צ ר' אהרן מרדכי רוקח שליט"א מבעלזא האט דאס לעצטע מאל געפראוועט א שבת אין מאנטריאל, גרייט מען זיך אצינד אויף א גרויסע שבת ווען הגה"צ ר' אהרן מרדכי שליט"א וועט אנקומען צוגאסט אין שטאט בשליחות הקודש פון אביו הגדול כ"ק אדמו"ר מבעלזא שליט"א, און פראווענען א שבת התאחדות אינאיינעם מיט די בעלזא חסידים תושבי מאנטריאל קאנאדע.
די שבת איז באשטימט אויף די וואך פרשת וארא, גענוי צוועלף יאר זינט דאס לעצטע שבת התאחדות אין מאנטריאל שבת וארא תשע"ד. ביי א ספעציעלע באזוך אין ארץ ישראל האבן די ראשי הקהילה און עסקנים פון חסידי בעלזא אין מאנטריאל געלאדנט הגה"צ ר' אהרן מרדכי בהורמנותא דמלכא פונעם רבי'ן שליט"א, און אצינד ווערן שוין געמאכט די לעצטע צוגרייטונגען צום געהויבענעם באזוך פונעם נסיך המלך אויפן קאנאדישן באדן.
היינט דינסטאג האט דער חשובער גאסט מופיע געווען בשערי העיר, און איז געווארן אפגעווארט אין לופטפעלד דורך די חשובי העדה און דייני הקהילה, נאך מעריב וועט פארקומען א מעמד קבלת פנים לכבודו אין ביהמ"ד זכרון יעקב יצחק דחסידי בעלזא אין מאנטריאל, אין לויף פון די ימי הביקור וועט ער באזוכן אין די קהילות ומוסדות דחסידי בעלזא אין שטאט, און אויף שבת קודש ווערט אויפגעשטעלט א ריזן שאטער צו קענען דארט אפרעכטן די תפילות און שבת אחים ברוב עם הדרת מלך.
