תלמידי וחסידי ערלוי אין אייראפע גרייטן זיך צו מקבל זיין בהדרת כבוד כ"ק אדמו"ר מערלוי שליט"א, וואס איז ערווארטעט צו מופיע זיין בשערי העיר לאנדאן הבירה די קומענדיגע וואך פרשת יתרו, צו באשיינען די שמחת החתונה פון א אייניקל אין א מזל'דיגע שעה.
יארן לאנג האט דער רבי שליט"א געוואוינט אין לאנדאן, זייענדיג אן איידעם ביי כ"ק אדמו"ר מסטאניסלאוו אלעסק זצ"ל וועלכער האט אנגעפירט זיין שיינעם הויף אין לאנדאן, מיט איבער צען יאר צוריק האט זיך דער רבי געצויגן קיין ארץ ישראל צו שטיין לימין הקודש פון זיין גרויסן פאטער הגה"ק מערלוי זצ"ל, און איז פארבליבן וואוינען אין די קטמון געגנט נאכן איבערנעמען די כתר ההנהגה מיט צען יאר צוריק.
דער רבי שליט"א וועט ארויספארן פון ארץ ישראל קומענדיגע וואך מאנטאג פרשת יתרו חמשה עשר בשבט, און זיך אויפהאלטן אין די סטעמפארד הילל געגנט אין לאנדאן פאר א גאנצע וואך, בבית האכסניא אין שטוב פון הרב החסיד ר' שמואל חיים בערקאוויטש הי"ו, דארט אין די אכסניא וועט דער רבי דאווענען די תפילות דורכאויס די וואך, און אויפנעמען דעם ציבור חסידים תושבי העיר מיט קוויטלעך.
מיטוואך פרשת יתרו וועט געפראוועט ווערן די שמחת החתונה פונעם רבי'נס אייניקל, די כלה א טאכטער פון זיין איידעם הגה"צ ר' יעקב יחזקי' אונגאר שליט"א, זון פון כ"ק אדמו"ר מנייטרא שליט"א, מיט די חתן יונגסטע זון פון הגה"צ ר' אשר חיים שטערנבוך שליט"א אבד"ק אהל יעקב ודומ"ץ מחזיקי הדת אנטווערפן. די חתונה קומט פאר אין די יסודי התורה זאל אין לאנדאן.
שבת קודש פרשת יתרו וועט דער רבי פראווענען אינאיינעם מיט קהל חסידיו תושבי אייראפע, א שבת התאחדות מחוץ לעיר, אין די פראכפולע יוניקא האטעל אין ענגלאנד, און מוצאי שבת וועט געפראוועט ווערן די מעמד עשירי קודש, שטייענדיג געציילטע וואכן בעפאר די צענטע הילולא קדישא פון כ"ק אדמו"ר הגה"ק גאב"ד ערלוי זצ"ל.
