אין א מזל'דיגע שעה איז געלאזט געווארן אין גאנג א מאסיווע בוי פראיעקט, אויפצובויען א שפאגל נייע בית המדרש הגדול פאר חסידי סטאניסלאוו, וואו כ"ק אדמו"ר מסטאניסלאוו שליט"א וועט בעז"ה אפרעכטן די תפילות און טישן אויף א געהויבענעם שטייגער מיט הרחבת הדעת.
דער סטאניסלאווער רבי שליט"א וועלכער איז ממלא מקום אביו כ"ק אדמו"ר מסטאניסלאוו זצ"ל, פירט ווייטער אן דעם שיינעם הויף בבית מדרשו אויף מעין סטריט, אבער צוליב די נאכאנאנדע וואוקס פונעם ציבור חסידים וואס קומען זיך מתחמם זיין לאורו הגדול, איז מען געווען געצווינגען אריינצושפרינגען אין א ערנסטע בוי פראיעקט אויפצובויען א פולשטענדיגע גרויסע בית המדרש מיט אלע באדערפענישן.
נאך עטליכע יאר וואס די בוי פלענער זענען אקטיוו, איז מען אצינד צוגעטרעטן צו די בוי פראיעקט, ווען מען האט זיך ארויסגעצויגן פונעם יעצטיגן בנין צו א צייטווייליגע לאקאל, ביז ווען די נייע ביהמ"ד וועט פארענדיגט ווערן לשם ולתפארת כלול בהדרו. אנגעהויבן פון פרשת כי תשא שבת פרה, איז די תפילות און טישן שוין געפראוועט געווארן אינעם צייטווייליגן לאקאל, אין די בנין פון ישיבת סטאניסלאוו אויף אמת לעין, און די טיש פרייטאג צונאכטס קומט פאר אין די זאל בבית הנגיד החסיד ר' חיים רויזמאן הי"ו וואס וואוינט נישט ווייט פונעם רבי'ן.
היינט מיטוואך זענען תושבי מאנסי איבערראשט געווארן צו זעהן די פאקטישע בוי ארבעט, ווען א טראקטאר האט זיך באוויזן נעבן די אלטע בית המדרש און אנגעהויבן צוזאמווארפן דעם בנין, סותר על מנת לבנות צו קענען אויפבויען אויפן פלאץ א שפאגל נייע בנין רחבת ידים לשם ולתהילה.
