שטייענדיג אין די טעג פון דעם יום הצלה פון דעם בעלזער רב זי"ע, אינאיינעם מיט זיין ברודער דער בילגורייער רב זי"ע, איז מען נתבשר געווארן מיט די בשורה היוצא מבית המלכות אז עס איז נארוואס געגעבן געווארן די נויטיגע פערמיטן צו קענען אנהייבן א מאסיווע פארברייטערונג צום ביהמ"ד הגדול אין קרית בעלזא. די נייע געגאנטישע פליגל וועט געבויעט ווערן אויפן שטח החצר וואו עס שטייט די סוכה און עטליכע חתונות און שמחות זענען דארט געפראוועט געווארן.
דאס קומט נאכדעם וואס עס איז שוין לאנגע יארן וואס דער ציבור הרחב האט זיך פילפאכיג צוברייטערט און די תפילות און טישן בצל הקודש פונעם בעלזא רב שליט"א זענען איבערגעפילט עד אפס מקום, און די עסקנים האבן שוין לאנג געזוכט א פאסיגע לעזונג צו דעם לחץ זו הדחק.
מיט דער פרישער פארברייטערונג, פלאנט מען אריינצונעמען דעם ריזן חצר הארט נעבן דעם ביהמ"ד צום ביהמ"ד הגדול, וואס וועט צוברענגען נאך עטליכע טויזנט זיץ פלעצער און קענען ערלויבן צו פראווען מעמדים דארט מיט הרחבת הדעת. די נייע חלק וועט פארברייטערן דעם ביהמ"ד הגדול ריזיג גרויס צו די מזרח, מעריב און דרום זייט, און פולפאכיג פארגרעסערן דעם 'טיש שטוב' מיט גרויסע גאלעריען.
די קהילה האט ארויסגעשטעלט א דאנק פאר די עסקנים וועלכע ארבעטן שוין יארן אויף דעם פראיעקט, בראש דער בארימטער מייסטער ארכיטעקט רבי אהרן עסטרייכער, ואתו עמו ר' אלימלך לאנגמאן, ר' ירמי' דמן, ר' זאב פארקאש, און ר' אלעזר ראוכבערגער.
בעלזא וועט זיין א ווינקל פאר תורה און יראת שמים ביז משיח וועט קומען.
