חסידים ואנשי מעשה אינעם עיר התורה והחסידות מאנסי, גרייטן זיך צו מקבל פנים זיין בהדרת כבוד כ"ק אדמו"ר מסטרעליסק שליט"א, וועלכער איז ערווארטעט זיך אריבערצוציען קיין מאנסי קובע זיין דארט מקום משכנו, און עפענען א נייע בית המדרש על שם אבותיו הקדושים לבית סטרעליסק.
דער רבי שליט"א איז דער עלטסטער זון פון כ"ק אדמו"ר מסטרעליסק הרה"צ רבי יעקב שלמה קלוגהופט זצ"ל, וועלכער איז נפטר געווארן מיט צוויי יאר צוריק, אן אייניקל פון כ"ק אדמו"ר מסטרעליסק הרה"צ רבי לוי יצחק קלוגהופט זצ"ל וועלכער איז געווען פון די חשובע אדמורי"ם אין שטאט לאנדאן, און א איידעם ביי כ"ק אדמו"ר הרה"ק בעל מאור ישראל מסקולען זצ"ל.
זינט דער רבי איז נתעלה געווארן בכתר האדמורו"ת נאכן הסתלקות פון זיין פאטער, האבן די חסידים ומעריצים זיך אריינגעלייגט אין א פראיעקט אוועקצושטעלן א בית מקדש מעט וואו דער רבי זאל קענען משפיע זיין לארץ ולדרים פון זיין רייכן קוואל בתורה וחסידות, מאוצר המנוצר פון אבותיו הקדושים, ולבית סקולען המעטירה וואו דער רבי שליט"א האט זיך געווארעמט צענדליגע יארן בצילא דמהימנותא פון זיין גרויסן שווער דער רבי זצ"ל.
אצינד גרייט מען זיך צום עפענונג פון די נייע סטרעליסקער בית המדרש, דעם קומענדיגן שבת קודש פרשת שמות, אינעם הערליכן לאקאל אויף מירון דרייוו אין מאנסי, דער רבי שליט"א וועט ארויסקומען קיין מאנסי יעדן שבת צו פראווענען די תפילות און טישן תמידין כסדרן, און אין די נאנטע צוקונפט זיך בעז"ה פולקאם אריבערציען קיין מאנסי אין א מזל'דיגע שעה.
