תושבי מאנסי באגריסן מיט פרייד די עפענונג פון א נייע בית המדרש אין די באקאנטע "מירון" געגנט, ווען דעם שבת קודש פרשת ויחי וועט בעז"ה געגרינדעט ווערן די ווארעמע חסידישע שטיבל "ביהמ"ד ברכת זאב זלאטאפאלי", בנשיאות הגה"צ רבי נחמן יוסף טווערסקי שליט"א אבד"ק זלאטאפאלי.
דער רב שליט"א איז א זון פון הרה"צ רבי וועלוויל טווערסקי זצ"ל מראחמיסטריווקא, נאך וועם די נאמען פון ביהמ"ד "ברכת זאב" איז געווידמעט, א זון פון כ"ק אדמו"ר הרה"ק רבי יוחנן מראחמיסטריווקא זצ"ל. דער רב שליט"א איז דער יונגסטער איידעם פון כ"ק אדמו"ר הרה"ק בעל תורת מרדכי מוויזניץ זצ"ל, און איז שוין פאר צענדליגע יארן פארררעכנט אלס איינער פון די חשובסטע אידן אין וויזניץ.
אצינד ווערט געעפנט די נייע ביהמ"ד על שם אביו, מיטן נאמען "זלאטאפאלי" לשמו ולזכרו פון הרה"ק רבי דוד מזלאטאפאלי זצ"ל, א זון פון הרה"ק רבי יוחנן הראשון מראחמיסטריווקא זצ"ל. די ביהמ"ד איז ערווארטעט אויסצושטייגן אלס א תל תלפיות פאר די גאנצע אומגעגנט, אנגעהויבן פון דעם שבת קודש פרשת ויחי.
היינט דאנערשטאג ויחי אויפדערנאכט וועט פארקומען די מעמד קביעת מזוזה ופתיחת שערים, ווען די תושבי השכונה וועלן זיך צוזאמנעמען צו פייערן דעם גרויסן דערגרייכונג, און דאווענען דעם ערשטן תפילה אינעם נייעם בית המדרש.
