ווידער פריידט מען זיך בחצר הקודש סאטמאר מיט די ווייטגרייכנדע הרחבת גבולי הקדושה אינערהאלב קהילות ומוסדות סאטמאר אלוועלטליך, דאסמאל מיט די שטארקע פארשריט פון די קהילה אין מאנטשעסטער, וואו מען האט אין די יעצטיגע טעג אפגעקויפט א פרישן בנין אלס אכסניא של תורה ותפילה, פארן ביהמ"ד אבני צדק דקהל יטב לב ד'סאטמאר.
אויסער די צענטראלע בית המדרש דקהל יטב לב ד'סאטמאר אין מאנטשעסטער, איז מיט צוויי יאר צוריק געעפנט געווארן נאך א בית המדרש אין די לויער ברוטאן געגנט מיטן נאמען "אבני צדק", בברכת קדשו ובעידודו פון כ"ק אדמו"ר מסאטמאר שליט"א, אונטער די פירערשאפט פונעם רב הקהילה הגה"צ ר' יקותיאל יצחק פאללאק שליט"א.
נאכן זיין סטאנציאנירט אין א צייטווייליגע לאקאל האט מען אצינד זוכה געווען לברך על המוגמר און שליסן קאנטראקט אויף א שיינער בנין וואס וועט פארוואנדלט ווערן אלס אכסניית קבע פארן ביהמ"ד אבני צדק, די נייע ביהמ"ד געפונט זיך אויף די וועלינגטאן סטריט וועסט גאס און איז ערווארטעט אויסצושטייגן אלס א תל תלפיות פאר די גאנצע אומגעגנט.
