היינט מיטוואך וועט כ"ק אדמו"ר מסקווירא מאנסי שליט"א ארויספארן אויף א מסע הקודש קיין ארץ ישראל צו מנחם אבל זיין די בני המשפחה, נאכן פטירה פון זיין שוויגער הרבנית הצדיקת חנה אסתר טווערסקי ע"ה, אלמנת הרה"צ ר' וועלוויל טווערסקי זצ"ל מראחמיסטריווקא.
די דאזיגע נסיעה טראגט א שטארקע באדייט ביי די חסידים, זייענדיג דאס ערשטע מאל וואס דער רבי שליט"א פארט אוועק אויף שבת מבית מדרשו, ווען דורכאויס די לעצטע פאר יאר זינט דער רבי האט אוועקגעשטעלט דעם שיינעם הויף אין מאנסי, האט דער רבי נאך קיינמאל נישט פארפעלט קיין שבת פון אפרעכטן די תפילות און טישן ווי געווענליך בקרב חסידיו.
דער רבי שליט"א וועט לאנדן אין ארץ ישראל מארגן דאנערשטאג אינדערפרי, און באלד נאך שחרית צופארן לבית האבלים אויף רחוב חנה אין ירושלים, דערנאך וועט דער רבי ארויספארן קיין גליל, און פוקד זיין די קברי צדיקים אין מירון צפת טבריה.
שבת קודש וועט דער רבי פראווענען אויף א געהויבענע פארנעם אין עיה"ק צפת, אינאיינעם מיט די מקורבים ובני המשפחה, און א געקליבענע צאל חסידים וואס קומען מיטהאלטן דעם געהויבענעם שבת בהרי ארץ הקודש. זונטאג וועט דער רבי מיטהאלטן די מעמד הקמת המציבה על קברה פון די שוויגער הרבנית ע"ה אין ירושלים, און שפעטער ביינאכט ארויספארן אויפן וועג צוריק אהיים קיין ניו יארק.
