JDN

שמחת בית באבוב: עס איז געשלאסן געווארן די שידוך פון א אייניקל ביי כ"ק אדמו"ר מבאבוב שליט"א, די כלה א טאכטער פון זיין איידעם הגה"צ ר' חיים שלמה האלבערשטאם שליט"א סגן דומ"ץ באבוב, זון פון הגה"צ ר' ברוך אברהם האלבערשטאם שליט"א אבד"ק קרשאנוב, איידעם ביי כ"ק אדמו"ר מסטריזוב שליט"א, מיט די חתן א זון פון הרה"ג ר' שלום דוד פאלגער שליט"א מרביץ תורה בק"ק באבוב, זון פון הרה"ג ר' חיים בנציון פאלגער שליט"א ר"ם בישיבת כרם שלמה ד'באבוב, און איידעם ביי הרב יצחק שלום לעזער שליט"א.

שמחת בית טשערנאביל – פארשעי – דזיקוב – סטאניסלאוו אלעסק: עס איז געשלאסן געווארן די שידוך פונעם חתן א זון פון הגה"צ ר' יעקב בער אשכנזי שליט"א אדמו"ר מסטאניסלאוו אלעסק מאנסי, איידעם ביי כ"ק אדמו"ר מטשערנאביל שליט"א, מיט די כלה א טאכטער פון הגה"צ ר' משה שמואל ראטטענבערג שליט"א ראש ישיבת תורת ישראל פארשעי, זון פון כ"ק אדמו"ר מפארשעי שליט"א, און איידעם ביי הגה"צ ר' מאיר הורוויץ שליט"א אדמו"ר מדזיקוב מאנסי.

דעם שבת קומט פאר די שמחת השלום זכר פון א אור אייניקל ביי כ"ק אדמו"ר מגור שליט"א, אייניקל פון זיין זון הגה"צ ר' שלמה צבי אלתר שליט"א, בן הנולד ביי זיין זון הרב ישראל אלתר שליט"א, איידעם ביי הרב יוחנן רובינשטיין שליט"א, איידעם ביי הגאון החסיד ר' אברהם יוסף אירנשטיין שליט"א משגיח ישיבת גור אין אשדוד. – די שמחה קומט פאר אין ביהמ"ד הגדול גור אין ירושלים.

כ"ק אדמו"ר מסאטמאר שליט"א וועלכער איז צוגאסט די טעג אין אייראפע אויפן גרויסן מסע הקודש "בוני המלוכה" אינאיינעם מיט די נגידים ותומכים פון די קהילה און מוסדות אין קרית יואל, וועט פראווענען דעם שבת אין די פראכטפולע דאבבל טרי האטעל אין שטאט קראקא, שבת אינדערפרי וועט פארקומען די מעמד הכנסת ספר תורה וואס ווערט אריינגעגעבן דורך די חברי הקהילה אין קרית יואל, און מוצאי שבת קודש וועט פארקומען די פראכטפולע מעמד עיר מלוכה, אינאיינעם מיט די סעודת מצוה לגומרה של תורה. היינט פרייטאג אינדערפרי וועט דער רבי פוקד זיין דעם ציון הק' פון זקינו הרה"ק מצאנז זי"ע בעל דברי חיים, וואו עס וועט פארקומען דארט אין שטאט צאנז די מעמד סיום כתיבת ספר תורה ברוב עם.

כ"ק אדמו"ר מבאבוב 45 שליט"א איז צוגאסט אויף דעם שבת אין די פראכטפולע HCS רעזארט אין סאוט פאולסבורג, אויפן גרויסן שבת "עוז ואורה" מיט די חסידים נדיבי לב וואס האבן זיך משתתף געווען מיט גרויסע סכומים פארן מבצע המחנה, לטובת די אפקויף פון די נייע יונגל קעמפ מחנה בני באבוב 45.

כ"ק אדמו"ר מראחמיסטריווקא שליט"א איז צוגאסט אויף דעם שבת אין מחנה אהל יצחק ראחמיסטריווקא אין גרינפיעלד פארק, אויפן גרויסן שבת חנוכת הבית אינאיינעם מיט הונדערטער חסידים פון אלע שטעט. היינט פרייטאג נאכמיטאג וועט דעם רבינ'ס שוואגער כ"ק אדמו"ר מוויזניץ שליט"א פון קייאמישא אויפטרעטן מיט א שמועס הכנה לקבלת התורה אין די נייע ביהמ"ד אין מחנה אהל יצחק.

כ"ק אדמו"ר מוויזניץ שליט"א פון וויליאמסבורג איז צוגאסט אויף דעם שבת אין בלומינגראוו קרית יואל, בקרב תלמידי ישיבתו הק' תורת מרדכי וויזניץ.

כ"ק גאב"ד סאטמאר מאנסי שליט"א וועט פראווענען דעם שבת אין די נייע סאטמארער בית המדרש "בנין שווארץ" אין ספרינג וואלי, שבת נאכמיטאג וועט דער רב שליט"א אויפטרעטן מיט א שיעור אין פרקי אבות און הכנה לקבלת התורה.

כ"ק אדמו"ר מבארניב שליט"א איז צוגאסט אויף דעם שבת אין מאנטריאל לטובת מוסדותיו הקדושים, די תפילות און טישן קומען פאר אין ביהמ"ד סקווירא און ביהמ"ד מאור הגולה, די אכסניא איז אין שטוב פון הנגיד החסיד ר' שמואל פישמאן הי"ו.

כ"ק אדמו"ר מנדבורנא שליט"א איז צוגאסט אויף דעם שבת אין שטאט פרימישלאן אין אוקראינע, לרגל די יומא דהילולא קדישא פון זקינו הרה"ק רבי ר' מאיר'ל פרימישלאנער זי"ע וואס געפאלט אויס שבת קודש כ"ט אייר.

כ"ק אדמו"ר מקרעטשניף קרית גת שליט"א איז צוגאסט אויף דעם שבת אין שטאט פרימישלאן אין אוקראינע, לרגל די יומא דהילולא קדישא פון זקינו הרה"ק רבי ר' מאיר'ל פרימישלאנער זי"ע וואס געפאלט אויס שבת קודש כ"ט אייר.

כ"ק אדמו"ר מפאלטישאן שליט"א איז צוגאסט אויף דעם שבת אין שטאט פרימישלאן אין אוקראינע, לרגל די יומא דהילולא קדישא פון זקינו הרה"ק רבי ר' מאיר'ל פרימישלאנער זי"ע וואס געפאלט אויס שבת קודש כ"ט אייר.

כ"ק אדמו"ר ממבקשי אמונה שליט"א איז צוגאסט אויף דעם שבת אין גרינפארק מודיעין עילית, די תפילות קומען פאר אין ביהמ"ד אהל אברהם און ביהמ"ד קהילות החסידים, און די טישן אין זאל פון בני הישיבות אויף רחוב הרב מפאנאוויטש.

הגה"צ אבד"ק קראסנא שליט"א איז צוגאסט אויף דעם שבת אין לעיקוואד בקרב תלמידיו וחסידיו, די תפילות, שיעור פרקי אבות, און שלש סעודות, קומען פאר אין ביהמ"ד סאטמאר און אין ביהמ"ד יגדיל תורה, די אכסניא איז אין שטוב פון הנגיד החסיד ר' חיים שמעון פישמאן הי"ו.

הגה"צ המשפיע ר' שמעון שפיטצער שליט"א איז צוגאסט אויף דעם שבת אין מאנסי בקרב שומעי לקחו, די תפילות, שמועסן, און שלש סעודות, וועט פארקומען אין די ווילחאוויץ זאל.

הגה"צ ר' חיים מאיר האגער שליט"א אבד"ק קרית וויזניץ ב"ב, בנו הגדול פון כ"ק אדמו"ר מוויזניץ שליט"א, איז צוגאסט אויף דעם שבת בקרב חסידי וויזניץ אין ביתר עילית, די תפילות, באטע, און שלש סעודות, קומען פאר אין ביהמ"ד בית שלום דחסידי וויזניץ אין שטאט.

הגה"צ ר' מנחם נחום קאהן שליט"א אבד"ק תולדות אהרן גבעת ירושלים בית שמש, זון פון כ"ק אדמו"ר מתולדות אהרן שליט"א, איז צוגאסט אויף דעם שבת אין ישיבה גדולה תולדות אהרן אין שטאט אלעד בקרב תלמידי הישיבה.

הגה"צ ר' שלום צבי סופר שליט"א בנו יחידו פון כ"ק אדמו"ר מערלוי שליט"א איז צוגאסט אויף דעם שבת בקרב חסידי ערלוי אין הר יונה.

כ"ק אדמו"ר מתולדות אהרן שליט"א וויילט דעם שבת אין עיה"ק צפת אויף אפרוה.