אין די יעצטיגע נאכמיטאג שעות פונעם גרויסן טאג ב' סיון יום המיוחס, ווערן שוין געמאכט די לעצטע צוגרייטונגען צום גרויסארטיגן דינער השנתי "מסורה", די הייליגע נאכט וואס ברענגט יאר יערליך צונויף טויזענטער תושבי העיר ואם בישראל בארא פארק, צו שענקן שטיצע פאר די הייליגע צדקה קאסע "קופת רבי מאיר בעל הנס, כולל חבת ירושלים", גענוי ווי אונזערע זיידעס און רבי'ס האבן זיך געפירט דור אחר דור.
די יערליכע דינער אין בארא פארק איז א זמן קהילה לכל, ווען אידישע קינדער זענען ממשיך די הייליגע מסורה פון אבותינו ורבותינו, מען לייגט צדקה אין די הייליגע פושקע, מען ליידיגט אויס די פושקע און מען שיקט אפ גרויסע געלטער פאר אחינו בני ישראל בארץ הקודש וואס זענען אנגעוואנדן אויף אט די געלטער.
איבערהויפט וועט ביי דעם גייסטרייכן מעמד אפגעצייכנט ווערן גאנצע הונדערט און פופציג יאר נאך די הסתלקות פונעם נשיא הכולל כ"ק הרה"ק מצאנז זי"ע בעל דברי חיים, וועלכער האט בשעתו אויפגעטון א געוואלד לטובת די עניי ארץ הקודש און זיין געוואלדיגער זכות באגלייט דעם כולל ביזן היינטיגן טאג, ווען צאצאיו ממשיכי דרכו טוען פארזעצן די שיינע וועגן די מסורה פון די פריערדיגע צדיקים.
די יערליכע דינער דאס יאר קומט פאר אין די פראכטפולע עטרת גאלדא זאל, וואו עס וועלן באשיינען בראש המסובים אלע אדמור"י ורבני העיר, ובראשם די נשיאי הכבוד פונעם כולל, כ"ק אדמו"ר מצאנז קלויזענבורג שליט"א און כ"ק אדמו"ר מבאבוב שליט"א, ווען אינעם גאנצן זאל וועט די טויזענטער פלעצער פארנומען ווערן דורך רבבות תושבי העיר וואס וועלן שטראמען פון אלע עקן שטאט צו מיטהאלטן די גייסטרייכע מאמענטן.
דער יושב ראש המעמד וועט זיין דער טאלאנטפולער מגיד מישרים הרב ר' ישראל שטערן הי"ו פון לאנדאן, און מיט א באריכט פון די אפיסעס פונעם כולל וועט אויפטרעטן דער מנהל הכולל הרה"צ ר' ישכר בעריש רובין שליט"א מדאמבראווא. אלס נואם הכבוד וועט אויפטרעטן דער בארימטער פה מפיק מרגליות הרה"ג ר' פנחס פריעדמאן שליט"א ראש הכוללים דחסידי בעלזא וראש ישיבת מבקשי ה'.
אזוי אויך וועט אויפטרעטן מיטן דבר המסורה הגה"צ ר' חיים שלמה האלבערשטאם שליט"א סגן דומ"ץ באבוב, חתנא דבי נשיאה פון כ"ק אדמו"ר מבאבוב שליט"א נשיא הכולל, וועלכער ווערט באקרוינט מיטן פרס חבת ירושלים תנו כבוד לתורה. דער פרס תורתו של רבי מאיר וועט געשאנקען ווערן פאר הרה"ג ר' נפתלי בנימין פאשקעס שליט"א מרבני ק"ק צאנז קלויזענבורג וראש ישיבת שער התורה.
אויך וועלן באעהרט ווערן מיט 'פרס נחלת אבות' צוויי חשוב'ע צאנזער אייניקלעך הרב ר' מרדכי ראבין שליט"א רב דק' ווישניצא לעיקוואד און הרב ר' הערשל הלברשטאם שליט"א, און דריי חשוב'ע נזר גבאי קודש הרב אלכסנדר אשר יונגרייז שליט"א, הרב שמחה ישכר בער רובין שליט"א און הרב שמואל אבא הלברשטאם שליט"א.
א ספעציעלער חידוש איז ערווארטעט היינט נאכט ביים גרויסן דינער אין עטרת גאלדא, ווען עס וועט געוויזן ווערן א רייכע פארשטעלונג פון היסטארישע חפצי קודש און אור אלטע בריוון בשייכות צום הייליגן צדקה קאסע פון כולל חבת ירושלים. רייכע מתנות וועלן פארטיילט ווערן פאר די חשובע תומכים, און א ספעציעלע מזכרת וועט געשאנקען ווערן פאר אלע משתתפים ביים דינער.
ויהי בישורון מלך, בהתאסף ראשי עם, יחד שבטי ישראל
