דעם שבת פרשת נשא וועט כ"ק אדמו"ר מסאטמאר שליט"א פראווענען א אייגענארטיגע שבת אויף א פארמאכטע פארנעם, ווען דער רבי וועט פארברענגען מיט די בני משפחת המלוכה כשתילי זיתים סביב לשולחנו, אין איינער פון די סאטמארער קעמפס אין די קאנטרי בערג.
דער רבי שליט"א האט שוין א לאנגע צייט צוריק אויסגעדרוקט רצון קדשו צו פראווענען א שבת בלויז מיט די בני המשפחה, די חשובע קינדער און אייניקלעך בליעה"ר, נאך וואס די ארגינעלע פלאן איז געווען אז די מעמד הכנסת ספר תורה פארן ספר תורה וואס דער רבי האט אריינגעגעבן פארגאנגענעם ל"ג בעומר וועט פארקומען אויף א באשיידענע פארנעם בלויז מיט די בני המשפחה, און איז צום סוף יא געפראוועט געווארן ברוב עם הדרת מלך.
די שבת וועט געפראוועט ווערן אין די סאטמארער מיידל קעמפ מחנה א' א' אין קערהאנקסאן, צו וואו דער רבי וועט ארויספארן אויף די בערג לכבוד שבת קודש און פארברענגען דעם גאנצן שבת מיט די קינדער און אייניקלעך זרע ברך ה', די תפילות, טישן, סעודות שבת קודש און אלעס ארום.
