אין די צייט וואס איבער גרעיטער ניו יארק און ניו דזשערזי הערשט א ערנסטע אויפוואכונג ביי אינגעלייט און בעלי בתים זיך ארויסצוציען אין פרישע געגנטער מחוץ לעיר, צו פארגרינגערן דעם שווערן דירות קריזיס וואס הערשט אין די גרויסע באוואוינטע שטעט, האט כ"ק אדמו"ר מצאנז קלויזענבורג שליט"א געשטעלט א ספעציעלער שליח וואס זאל זיך אפגעבן מיט אט די ענינים ווען חסידי צאנז קלויזענבורג ווילן ארויסמופן צו אנדערע געגנטער.
דער רבי שליט"א האט זיך אויסגעדרוקט אז ווען מען ציהט זיך ארויס צו א אנדערע געגנט, דארף מען גיין מיט א חבורה, נישט צו פארלירן דעם רוחניות'דיגן שטאנדפונקט וואס א מענטש האט אלס טייל פון א קהילה, דעריבער האט דער רבי אויפגענומען א אינגערמאן צו וועם מען זאל זיך ווענדן אויב מען וויל זיך ארויסציען אין א אנדערע געגנט, און אזוי וועט מען קענען צוזאמשטעלן א חבורה וואס זאל זיך אינאיינעם ארויסציען מיט אלע קהילה אנגעלעגנהייטן.
אזוי אויך איז באשטימט געווארן אז עס וועט פארקומען א ספעציעלע אינפארמאציע אווענט פאר די אלע חסידים וואס קלערן זיך ארויסצוציען צו אנדערע געגנטער, וואו מען וועט הערן פארשידענע פרטים איבער די נייע געגנטער, און אזוי ארום פארמירן א חבורה פון חסידי צאנז קלויזענבורג זיך ארויסצוציען מחוץ לעיר אינאיינעם בחבורה.
