אלפי חסידי צאנז פרייען זיך מיט די הרחבת גבולי הקדושה, ווען אין די יעצטיגע טעג איז געמאלדן געווארן די עפענונג פון די ערשטע "צאנזער מוסדות" על אדמת אייראפע, א נייער תלמוד תורה פאר חסידי צאנז אין שטאט לאנדאן, וואס וועט זיין בעז"ה א מקום תורה וואו די צעירי הצאן וועלן נתחנך ווערן בדרך התורה והחסידות.
ווי ביי אלע תלמודי תורה דחסידי צאנז איבער די וועלט, וועט אויך די חדר אין לאנדאן טראגן דעם נאמען "דרכי אבות", בברכתו ובעידודו פון כ"ק אדמו"ר מצאנז שליט"א וועלכער האט באאויפטראגט די עסקני הקהילה זיך אריינצולייגן אין די עבודת הקודש צו מייסד זיין דעם נייעם תלמוד תורה אין לאנדאן, אין די צייט וואס די קהילה נאה וחסידה דחסידי צאנז אין לאנדאן וואקסט און בליהט לשם ולתפארת, ווען מיט קוים עטליכע וואכן צוריק איז געלאזט געווארן אין גאנג א מאסיווע בוי פראיעקט אויפצובויען א שפאגל נייע ביהמ"ד פאר די קהילה אין לאנדאן.
בהוראת הקודש פונעם רבי'ן איז געשטעלט געווארן א וועד הנהלה רוחנית וואס וועט שטיין אין שפיץ פון אלע אקטיוויטעטן אין תלמוד תורה, הרה"ג ר' אברהם שמואל ליעבער שליט"א ראה"כ ערב דברי חיים אין ביהמ"ד צאנז אין לאנדאן, הרה"ג ר' משה וויינבערגער שליט"א ראש חבורת אורח חיים אין כולל שפע חיים צאנז אין לאנדאן, און הרה"ג ר' יוסף יצחק בראנדסדארפער שליט"א לאנגיעריגער מרביץ תורה אין די קהילה.
די נייע חדר וועט זיך עפענען בעז"ה קומענדיגן חודש חשון הבעל"ט, צום נייעם לערן יאר בשעה טובה ומוצלחת.
