אידישע קינדער זענען מרבה בתפילה לרפואת הגאון הגדול רבי אברהם יהושע סאלאווייטשיק שליט"א ראש ישיבת בריסק, וועלכער איז היינט דאנערשטאג אריינגעפירט געווארן צו די הדסה שפיטאל אין ירושלים, אין די צייט וואס דער ראש ישיבה טוט זיך ערהוילן נאך א שווערע הארץ אפעראציע.
דער ראש ישיבה וועלכער האט געליטן ערנסטע הארץ קאמפליקאציעס אין די לעצטע תקופה, איז פארגאנגענע וואך אריבער א קאמפליצירטע אפעראציע אויפן הארץ, אין לויף פון די וואך האט דער ראש ישיבה זיך עטוואס ערהוילט, און איז מיט עטליכע טעג צוריק באפרייט געווארן פון שפיטאל צו זיין שטוב אין ירושלים עיה"ק.
היינט דאנערשטאג דורכ'ן טאג איז די געזונט צושטאנד ביים ראש ישיבה שטארק פארערגערט געווארן ל"ע, און מען האט שנעל אפגעפירט דעם ראש ישיבה אין שפיטאל פאר דריגענדע באהאנדלונגען, ווען די טויזענטער תלמידים ושומעי לקחו זענען שטארק באזארגט איבער די שווערע געזונט צושטאנד ביים ראש ישיבה.
בהיכל ישיבת בריסק און אין נאך ישיבות און כוללים האט מען זיך געשטעלט זאגן תהלים לרפואתו, אידישע קינדער זענען מתפלל לרפואת הגאון רבי אברהם יהושע בן עטיל, בתוך שאר חולי ישראל.
