היינט מיטוואך איז כ"ק אדמו"ר מגור שליט"א אריבער אן אפעראציע אויף די אויגן, אין די צייט וואס אלפי חסידי גור בכל מקומות מושבותיהם האבן מתפלל געווען למען בריאתו השלימה פונעם רבי'ן, דער רבי זאל זיך ערהוילן גרינג און געשווינד.
דער רבי שליט"א וועלכער ליידט די לעצטערע תקופה פון א ערנסטע שוואכקייט אין די אויגן, איז אריבער א סעריע אונטערזוכונגען אין די לעצטערע וואכן, ביז די דאקטוירים האבן באשטעטיגט דורכצופירן דעם אפעראציע מיטן האפענונג פאר די געוואונטשענע רעזולטאטן. די אפעראציע איז פארגעקומען היינט מיטוואך צופרי אין א פריוואטע מעדיקל צענטער אין שטאט הרצליה, און איז ב"ה געקרוינט געווארן מיט הצלחה.
אויפן פערזענליכן בקשה פונעם רבי'ן האט דעם רבינ'ס זון הגה"צ ר' נחמי' אלתר שליט"א איבערגעגעבן א הודעה פאר די חסידים אז די אפעראציע איז אריבער מיט הצלחה און דער רבי שפירט זיך גוט ב"ה, דער רבי שליט"א וועט פארבלייבן דארט אין הרצליה פאר נאך עטליכע טעג, וואו דער רבי וועט זיך אפרוען אין א פריוואטע אכסניא ביז נאך שבת.
