חסידי וויזניץ זענען איינגעהילט אין פרייד מיט די פרישע הרחבת גבולי הקדושה, ווען אין די יעצטיגע טעג איז אריין אין קראפט א מוצלח'דיגע מקח פאר א נייע ביהמ"ד אין מאנסי פאר חסידי וויזניץ וויליאמסבורג, א בנין רחבת ידים אין צענטער פון שטאט מאנסי וואס וועט פארוואנדלט ווערן אלס תל תלפיות פאר די חסידים תושבי העיר.
שוין עטליכע יאר איז אריבער זינט די עפענונג פון די בית המדרש "תורת מרדכי" דחסידי וויזניץ וויליאמסבורג אין שטאט מאנסי, און ווערט געפירט תחת דגלו והדרכתו פון כ"ק אדמו"ר מוויזניץ שליט"א פון וויליאמסבורג, וואו די חסידים פאראייניגן זיך בשבת אחים גם יחד ביי די תפילות שבת קודש מדי שבת בשבתו, און די תפילות און שיעורי תורה יעדע נאכט מיט א קביעות. עס האט זיך אבער שטארק אנגעזעהן די נויט צו פארברייטערן די גבולי הקדושה און קויפן א אייגענע בנין וואו צו קענען מרחיב זיין מיט הרחבת הדעת.
אצינד האבן די עסקני הביהמ"ד אינאיינעם מיט די הנהלה פון קהל תורת חיים וויזניץ אין וויליאמסבורג, אונטערגעשריבן קאנטראקט אויף א הערליכע געביידע אויף מעיפל טערעס, נישט ווייט פון די ביז יעצטיגע ביהמ"ד, וואו מען וועט בקרוב הימים רענאווירן די געביידע און אהערשטעלן א פראכטפולע היכל ביהמ"ד מיט אלע באדערפענישן לרווחת הציבור.
די דריי און א האלב מיליאן דאללער'דיגע מקח איז אריין אין קראפט בברכתו ובעידודו פונעם מנהיג העדה כ"ק אדמו"ר מוויזניץ שליט"א פון וויליאמסבורג, בהסכמתו ובברכתו פון זיין ברודער כ"ק אדמו"ר מוויזניץ שליט"א פון מאנסי וועלכער האט אויסגעדרוקט גרויס פרייד צו די הרחבת גבולי הקדושה.
