יעצט נאכמיטאג אין ארץ ישראל איז כ"ק אדמו"ר מגור שליט"א אנגעקומען צום מיליטערישן טורמע נומער צען, אין באגלייטונג פון טויזענטער חסידים אינגעלייט און בחורים, צו מוחה זיין כדת של תורה קעגן די שרעקליכע רדיפת הדת ווען צענדליגע בחורים און אינגעלייט ווערן ארעסטירט פארן איינציגן זינד פון לערנען תורה און זיך נישט שטעלן צום מיליטער.
דאס קומט נאכדעם וואס די יהדות החרדית בארה"ק קאכט ווי א קעסל די לעצטע פאר טעג, ווען עס איז ליידער דורכגעפירט געווארן צענדליגע ארעסטן דורך די מדינת ישראל מיליטער, אריינגערעכנט א בחור מחסידי גור, און זיי באדראען צו ארעסטירן נאך לומדי תורה.
יעצט נאכמיטאג קומט פאר א ריזן עצרת הרבבות פארנט פון די מיליטערישע טורמע נומער צען, וואו עס באטייליגן זיך טויזענטער גערער חסידים פון איבער גאנץ ארץ ישראל, און אצינד אין א היסטארישע שריט איז כ"ק אדמו"ר מגור שליט"א פערזענליך אנגעקומען זיך באטייליגן ביים עצרת בראש קהל חסידיו, אנדערש ווי ביז היינט ווען ביי די עצרות תפילה פארנט פון טורמע האבן זיך באטייליגט בלויז דעם רבינ'ס קינדער און די רבני הקהילה.
