שמחת בית צאנז: היינט קומט פאר די שמחת השבע ברכות פון א אייניקל ביי כ"ק אדמו"ר מצאנז שליט"א, די כלה א טאכטער פון זיין זון הגה"צ רבי יוסף משה דוב האלבערשטאם שליט"א אבד"ק צאנז ארה"ב, איידעם ביי הגה"צ אבד"ק מאקאווא אלעד זצ"ל, מיט די חתן א זון פון הרב נפתלי גליק שליט"א פון לאנדאן, איידעם ביי הגה"צ ר' משה יהודה היילפערין שליט"א אבד"ק בית שמואל ראדאמישלא לאנדאן. – די שמחה קומט פאר היינט נאכמיטאג בביתו נאוה קודש פון כ"ק אדמו"ר מצאנז שליט"א, ספעציעל פאר די צאנזער חסידים פון לאנדאן, שפעטער ביינאכט קומט פאר די שמחת השבע ברכות פאר די געסט פון אמעריקע.
היינט קומט פאר די שמחת החתונה פונעם חתן א זון פון הרב ברוך פנחס שיק שליט"א, זון פון כ"ק אדמו"ר מאוסטראה שליט"א פון וועסלי הילס, און איידעם ביי הגה"צ אבד"ק טאמאשוב שליט"א, מיט די כלה א טאכטער פון הגה"צ ר' משה יהושע מיכלאוויטש שליט"א אדמו"ר מבראד, איידעם ביי כ"ק אדמו"ר מנאראל שליט"א. – די שמחת החתונה קומט פאר אין זאל עטרת טשארנא אין מאנסי.
היינט קומט פאר די שמחת החתונה פונעם חתן א זון פון הרב יואל יהושע העשיל בלום שליט"א, זון פון כ"ק אדמו"ר מתולדות רפאל קאשוי שליט"א, און איידעם ביי הגה"צ אב"ד בעהוץ שליט"א, מיט די כלה א טאכטער פון הרב אשר אנשיל לעמבערגער שליט"א, זון פון הגה"צ אבד"ק מאקאווא ב"פ זצ"ל, און איידעם ביי הגה"צ ר' פנחס צבי וויינבערגער שליט"א אב"ד ניגרעשט. – די שמחת החתונה קומט פאר אין זאל ויואל משה אין וויליאמסבורג.
היינט קומט פאר די שמחת החתונה פונעם חתן א זון פון הרב יוסף יודא ווייסמאנדל שליט"א, זון פון הגה"צ אבד"ק נייטרא מאנסי שליט"א, און איידעם ביי הגה"צ ר' לייבוש רובין שליט"א מציעשנוב, מיט די כלה א טאכטער פון הרב אברהם ברוך זאבערמאן שליט"א, זון פון הגה"צ ר' משה זאבערמאן זצ"ל, און איידעם ביי הגה"צ אבד"ק נאסויד שליט"א. – די שמחת החתונה קומט פאר אין זאל תפארת רבקה אין בארא פארק.
היינט קומט פאר די שמחת הבר מצוה פון א אייניקל ביי כ"ק אדמו"ר מבורשטין שליט"א, א זון פון זיין איידעם הגה"צ ר' חיים יצחק באב"ד שליט"א אבד"ק קהל אברכים אין לינדען, זון פון הגה"צ אבד"ק טארנאפאל שליט"א. – די שמחה קומט פאר אין ביהמ"ד קהל אברכים אין לינדען.
היינט קומט פאר די שמחת הברית פון א אור אייניקל ביי כ"ק אדמו"ר מבית יצחק ספינקא שליט"א, אייניקל פון זיין זון הגה"צ ר' יהודה הורוויץ שליט"א, איידעם ביי כ"ק אדמו"ר מזידטשויב ב"ב שליט"א, בן הנולד ביי זיין זון הרב יצחק אייזיק הורוויץ שליט"א, איידעם ביי הרב יוסף דוב ראזענפעלד שליט"א. – די שמחה קומט פאר אין ספינקא בית המדרש אויף קיעפ סטריט אין וויליאמסבורג.
היינט קומט פאר די גרויסארטיגע מעמד הנחת אבן הפינה פארן נייעם ביהמ"ד דחסידי באבוב 45 אין לאנדאן, אויפן שטח הבניה אויף די קלעפטאן קאממאן גאס, אין שפיץ פון כ"ק אדמו"ר מבאבוב 45 שליט"א וועלכער איז אנגעקומען צוגאסט קיין לאנדאן צו באשיינען די מעמד.
היינט קומט פאר א גרויסע עצרת תפילה אויף די גאסן ארום כיכר זופניק אין ירושלים עיה"ק, אויפן רוף פונעם בית דין הגדול שבירושלים העדה החרדית, צו מתפלל זיין און מעורר זיין רחמי שמים, און אויסשרייען דעם קול מחאה קעגן די שרעקליכע רדיפת הדת מיט די גזירת הגיוס בארץ הקודש.
היינט קומט פאר די מעמד הכנסת ספר תורה וואס ווערט אריינגעגעבן צום סאטמארער בית המדרש אין בני ברק, לזכר נשמתם פון צדיקי בית סאטמאר זי"ע, אין שפיץ פון הגה"צ ר' שמעון זאב מייזליש שליט"א רב ביהמ"ד ישמח משה אין קרית יואל, בשליחות חותנו הגדול כ"ק אדמו"ר מסאטמאר שליט"א.
כ"ק אדמו"ר מראחמיסטריווקא שליט"א וועלכער האט זיך אויפגעהאלטן די לעצטע צוויי טעג אין ניו יארק לטובת דעם קרן עולם התורה, קערט זיך היינט צוריק למעון קדשו אין ארץ ישראל.
כ"ק אדמו"ר מקרעטשניף סיגעט וומס"ב שליט"א וועלכער האט זיך אויפגעהאלטן די לעצטע וואך צייט אין מאנטריאל לטובת מוסדותיו הקדושים, קערט זיך היינט צוריק למעון קדשו אין וויליאמסבורג.
היינט ג' תמוז געפאלט די יומא דהילולא קדישא פון כ"ק אדמו"ר הרה"ק מליובאוויטש זצ"ל, טויזענטער אידן גייען ארויף צום ציון הק' אויפן מאנטיפיורי בית החיים אין קווינס להיפקד בדבר ישועה ורחמים.
ניחום אבלים:
כ"ק אדמו"ר מוואסלוי שליט"א זיצט שבעה די טעג, נאך די פטירה פון זיין זון הגה"צ ר' חיים דוב היילפערין זצ"ל, איידעם ביי כ"ק אדמו"ר מבוהוש שליט"א, אינאיינעם מיט זיינע קינדער און די אייניקלעך די יתומים, אין שטוב פונעם נפטר אויף רחוב ברוך בן נריה אין בני ברק.
אריינצושיקן מודעות און נייעס, שיקט אן אימעיל צו NEWS@JDNMAIL.COM
