א ביטערע פאסירונג האט זיך אפגעשפילט היינט פארטאגס אין שטאט נתני' אין ארץ ישראל, ווען א בייזוויליגער פארשוין האט קאלטבלוטיג געשטאכן און ערמארדעט הגאון המקובל רבי עמוס חיים גואטה זצ"ל, ראש ישיבת רבי יצחק חי טייב אין נתני', זייענדיג בהיכל בית מדרשו אין נתני' אינמיטן דאווענען, אין עלטער פון פינף און זיבעציג יאר.
דער גאון איז געווען א באקאנטער מקובל ביי די ארטיגע ספרדישע געמיינדע, צענדליגע יארן האט ער געוואוינט אין נתני' וואו ער האט משפיע געווען פאר שומעי לקחו תורה ויראת שמים. היינט פארטאגס האט ער זיך געשטעלט דאווענען ווי געווענליך בבית מדרשו, אינמיטן דאווענען איז א צורידערטע פארשוין אריינגעקומען און געוואלט מיטדאווענען, אבער צוליב א ויכוח וואס האט זיך געשאפן אויפן פלאץ איז דער פארשוין צוגעגאנגען צום מקובל און אים געשטאכן פיר מאל אין הארץ רח"ל.
טראץ די פרואוון פון די הצלה לייט איז דער מקובל ליידער נפטר געווארן אויפן פלאץ, צום טיפן צער און טרויער פון זיינע טויזענטער תלמידים וחסידים, די לוויה איז פארגעקומען מיט די באטייליגונג פון טויזענטער אידן, צווישן זיי כ"ק אדמו"ר מצאנז שליט"א וועלכער איז ארויסגעקומען אפגעבן דעם כבוד האחרון און מיטשפירן דעם שרעקליכן צער פון אזויפיל תושבי העיר.
