אין די יעצטיגע טעג איז באשטעטיגט געווארן די פלענער איבער די גרויסע מעמד הנחת אבן הפינה בחצר הקודש אלכסנדר, וואס וועט בעז"ה פארקומען קומענדיגע וואך מאנטאג פרשת מטות מסעי כ"א תמוז, ווען עס וועט געלייגט ווערן די גרונדשטיין פארן נייעם בית המדרש הגדול והחדש מרכז העולמי דחסידי אלכסנדר, ההולך ונבנה אינעם עיר התורה והחסידות בני ברק.
שוין א שטיק צייט צוריק איז געלאזט געווארן אין גאנג די מאסיווע בוי פראיעקט, און דורכאויס די לעצטע פאר חדשים איז פארגעקומען העפטיגע גראב ארבעט אויפן שטח, וואו די ארבייטער האבן גרייט געמאכט דעם באדן צום אויפבוי פון א גרויסע הערליכע אכט שטאקעדיגע געביידע, וואס וועט פארמאגן אלע באדערפענישן פאר א גרויסן בית המדרש און א חסידישן הויף.
אצינד גרייט מען זיך צום מעמד הנחת אבן הפינה וואס איז באשטימט געווארן אויף קומענדיגן מאנטאג, אין שפיץ פון כ"ק אדמו"ר מאלכסנדר שליט"א, מיט די באטייליגונג פון פילע אדמורי"ם ורבנים און הונדערטער חסידים פון נאנט און ווייט.
