א ביטערע בשורה פארשפרייט זיך אצינד בעולם התורה אין אמעריקע, און בפרט ביי תושבי מאנסי והגלילות, אז איינער פון די גאר חשובע מרביצי תורה אין שטאט, הגאון הגדול רבי מרדכי הכהן בעק זצ"ל ראש ישיבת תפארת משה איז פלוצלינג נפטר געווארן היינט אינדערפרי, צום טיפן צער און שאק פון פילע תלמידים ומעריצים וכל בית ישראל.
דער ראש ישיבה איז געווען באקאנט מיט זיין גדלות בתורה, זיין הרבצת התורה וואס איז געווען א שם דבר, כל ימי חייו איז ער געזעסן באהלה של תורה און געלערנט בהתמדה רבה, צענדליגע יארן האט ער מרביץ תורה געווען פאר תלמידים, אין די ערשטע יארן אלס מגיד שיעור אין די בארימטע נייטרא ישיבה, און שפעטער אין זיין אייגענע ישיבה "תפארת משה", וואו ער האט מעמיד געווען תלמידים לאלפים דורכאויס די יארן.
תש"ו איז דער ראש ישיבה זצ"ל געבוירן געווארן אין שטאט פרעשבורג אין סלאוואקיי, נאך פון קינדווייז אן איז ער שטענדיג געווען פארנומען מיט לימוד התורה, זיין משפחה איז ארויסגעקומען קיין מאנטריאל קאנאדא, און פון דארט איז ער געפארן לערנען קיין נייטרא, און צו די בארימטע לעיקוואדער ישיבה וואו ער איז געשטיגן בתורה והוראה.
שפעטער איז ער געפארן לערנען קיין ארץ ישראל אין די בריסקער ישיבה, וואו ער האט געלערנט בחברותא מיט להבחל"ח הגאון הגדול רבי אברהם יהושע סאלאווייטשיק שליט"א ראש ישיבת בריסק. בהגיעו לפירקו האט ער חתונה געהאט מיט זיין חשובע רעבעצין תחי', א טאכטער פון הרב החסיד ר' הערש אלימלך כהנא ע"ה מחשובי חסידי סאטמאר.
אלס אינגערמאן האט ער זיך געצויגן קיין ניו יארק וואו ער איז אויפגענומען געווארן אלס מגיד שיעור אין ישיבת נייטרא, און שפעטער מיט ארום פינף און דרייסיג יאר צוריק האט ער זיך געצויגן קיין מאנסי וואו ער האט געגרינדעט זיין אייגענע ישיבה "תפארת משה", א חשובע מקום תורה וואו עס זיצן און הארעווען בחורים מצויינים אויפן בריסקער שטייגער. דארט בהיכל ישיבתו הקדושה אויף קאלעדזש ראוד האט ער מרביץ תורה געווען און פארגעלערנט טיפזיניגע שיעורים, דערהויבן די בחורים העכער און העכער, און זיך ספעציעל אפגעגעבן מיט זיינע תלמידים וואס זענען שוין געווען מער אויף די עלטערע יארן.
די דמות פון זיינע גרויסע רבי'ס איז שטענדיג געווען נר לרגליו, דער בריסקער רב זצ"ל ביי וועם ער האט זיך געווייקט אין זיינע יונגע יארן, הרה"ק מסאטמאר זצ"ל וועמענס דעת תורה ער האט שטענדיג געהאט פארנט פון זיינע אויגן, ער איז געווען א לוחם מלחמת ה' ברמה און אסאך אויפגעטון פאר אידישקייט בימינו אלה.
דורכאויס די יארן איז ערשינען פרי עמלו און חידושי תורה פונעם ראש ישיבה, אין די ספרים "פרשת מרדכי" געבויעט אויף זיינע שיעורים על מסכתות הש"ס. אזוי אויך האט ער אנגעפירט דעם שיינעם בית המדרש קהל סגולת ישראל וואו ער איז געווען א באליבטער רב פאר די מתפללים אין אלע הינזיכטן.
אין לויף פון די קאוויד עפאכע איז דער ראש ישיבה געווען זייער נישט געזונט ל"ע, ער האט זיך געמוטשעט א לענגערע צייט און זינט דאן האט ער געלעבט אויף גרויסע נסים. היינט דינסטאג אינדערפרי אנקומענדיג אין ישיבה פאר א פרישע טאג בין כותלי הישיבה, איז ער ליידער פלוצלינג אוועקגעפאלן רח"ל, און טראץ די פרואוון פון חברה הצלה איז ער ליידער נפטר געווארן אויפן פלאץ, זייענדיג אלט אכציג יאר.
זיין פלוצלינגדיגע פטירה רופט אויס אן אומבאשרייבליכע טרויער ביי תלמידיו ומעריציו, וואס וועלן זיך בענקן נאך דעם ווארעמען שמייכל פונעם ראש ישיבה, און די טיפזיניגע שיעורים וואס האט מאיר פנים געווען לכל אדם.
די לוויה וועט פארקומען היינט פינף דרייסיג נאכמיטאג ביי ישיבה תפארת משה אויף קאלעדזש ראוד אין מאנסי, אויפן וועג צום בית החיים אין קרית יואל וואו ער וועט קומען לקבורה.
זכר צדיק לברכה לחיי העולם הבא.
