אין א בחינה פון ורוח הקודש אומרת כן ירבה וכן יפרוץ, זענען תלמידי וחסידי סאטמאר נתבשר געווארן אין די יעצטיגע טעג איבער נאך א ישוב וואו חסידי סאטמאר וועלן זיך באזעצן, די באקאנטע קוט. סט. לוק אין מאנטריאל, וואו עס געפונט זיך שוין א שיינע קבוצה חסידי בעלזא און נאך פילע אידן וואס קומען ארגינעל פון מאנטריאל קאנאדע.
די קוט. סט. לוק געגנט געפונט זיך נישט ווייט פון די היימישע געגנט אין מאנטריאל, און איז אויסגעשטיגן אלס א פאסיג ארט וואו חסידישע פאמיליעס ציען זיך ארויס פון מאנטריאל צו קענען געניסן פון רחבות'דיגע דירות מיט ביליגערע פרייזן. נאך וואס חסידי סאטמאר אין מאנטריאל האבן אנגעהויבן קלערן פון זיך אהינציען בחבורה, האט מען זיך שואל עצה געווען מיט כ"ק אדמו"ר מסאטמאר שליט"א כדת מה לעשות.
אין די לעצטערע וואכן זענען עטליכע עסקנים אראפגעפארן קיין ניו העמפשער און דורכגעטון די נושא מיט כ"ק אדמו"ר מסאטמאר שליט"א, דער רבי שליט"א האט זיך אינטערסירט איבער די פרייזן און די גענויע דעטאלן פונעם ישוב, און געגעבן זיין פולסטן הסכמה און ברכת הקודש צו מרחיב זיין די גבולי הקדושה.
אין די יעצטיגע טעג האט זיך פארמירט א ספעציעלע וועד קבוצת אנ"ש ד'סאטמאר ארויסצוהעלפן די אינגעלייט וואס ווילן זיך ארויסציען קיין קוט. סט. לוק, און ספעציעלע אסיפות וועלן פארקומען אין דעם געביט, סיי צו העלפן דעם ציבור קובע זיין א גוטע ישוב, און סיי אוועקצושטעלן א קהילה א בית המדרש מיט אלע באדערפענישן וואס פעלט זיך אויס פאר א קהילה נאה.
