אין די יעצטיגע טעג איז די הנהלת הקריה אין קרית יואל אריין אין קאנטראקט אפצוקויפן א גרויסער בנין און א רחבות'דיגע שטח אינעם עיר ואם בישראל קרית יואל, וואו עס וועט בעז"ה ווערן אוועקגעשטעלט א קביעות'דיגע אכסניא פאר די בארימטע מתיבתא "שיעור ד'" אין קרית יואל, וואס געפונען זיך ביזדערווייל אין א ענגע לאקאציע.
די מתיבתא שיעור ד' געפונט זיך די לעצטע פופצן יאר אינעם בנין פון מצילי אש אין קרית יואל, נעבן די אשת חיל קימפעטארין היים, וואו די ישיבה איז געווארן איינקוואטירט זינט איר גרינדונג מיט ארום פופצן יאר צוריק, צו זיין א געהעריגע ישיבה פאר די עלטערע בחורים ווען זיי ענדיגן די געווענליכע ישיבה יארן.
דורכאויס די יארן איז די צאל תלמידים אין ישיבה געוואקסן, ווען אין די זעלבע צייט איז די בנין געווארן מער פארנומען, סיי מיט די פארשידענע איינריכטונגען פון מצילי אש וואס האט זיך וויכטיג געדארפט אויסברייטערן, און סיי ווען די גאנצע אומגעגנט איז געווארן פיל מער געדעכט און באוואוינט.
אין די יעצטיגע וואכן האט די הנהלת הקריה געטראפן א פאסיג ארט וואו צו איינקוואטירן די ישיבה, ביים ווינקל פון קאונטי רוט 44 און פארעסט ראוד, וואו עס איז פארהאן א גרויסער בנין וואס קען גרינג פארוואנדלט ווערן אין א פולשטענדיגע בנין הישיבה, און אויך א גרויסע שטח דערנעבן וואו זיך צו פארברייטערן. בברכת הקודש פון כ"ק אדמו"ר מסאטמאר שליט"א האט מען געגעבן דיפאזיט און אונטערגעשריבן קאנטראקט, מיטן האפענונג צו קענען גומר זיין דעם דריי מיליאן דאללערדיגע מקח ביז קומענדיגן חודש כסלו הבעל"ט.
